Shillong, K’lyngkot 09 : U MP ka Shillong bad President ka Meghalaya Pradesh Congress Committee (MPCC) Bah Vincent H Pala, ula kyntu ia ka seng Hynniewtrep National Liberation Council (HNLC) ba kan ym pynsangeh ne pynkut noh ia ka jingiakren iasuk.
Haba iakren bad ki nongthoh khubor hynne ka sngi Ba-ar, u Bah Pala ula ban jur ba ka HNLC ka dei ban long kaba iaishah namar ka rai ba ka shim ka lah ban don shibun ki jingktah. Kum kane ka rai ka lah ban ktah ia ka ioh ka kot ka Jylla, ka jingim ki briew bad shibun kiei kiei hapoh ka Jylla.
Lah ban kdew ba ka HNLC kala pynkut noh ia ka jingiakren iasuk ha ka 8 tarik Kyllalyngkot, 2024 da ka jingaiti ia ka shithi ba pynbna ia kane ka rai sha ka Sorkar Jylla.
Ka HNLC kala kdew iaka jingbym shimkhia jong ka Sorkar ia ki mat jingdawa ka seng kum ka daw ba ka rai ban pynsangeh noh ia kane ka jingiakren iasuk. Kawei na kine ki mat ka dei ban map noh ia ki kam bymman bala pynngat ia ki Nongialam bad ki dkhot.
