spot_img

Kyntu u DyCM ia ki Nonghikai Adhoc ban sangeh noh ia ki jingiakhih

Date:

Share post:

Ki Managing Committee jong ki skul ruh ki dei ban synniang lem

Shillong, Jylliew 30: U Symbud Myntri Rangbah ka Jylla Bah Prestone Tynsong hynne ka sngi palei, ula kyntu ia ki Nonghikai skul Adhoc ba kin pynsangeh noh ia ki jingiakhih namar ka Sorkar Jylla kala dep kut jingmut ba kan pynkiew noh ia ka Grant-in-aid hapoh kine ki khyndiat sngi ban wan.

Ha kajuh ka por, u Bah Prestone ula kyntu ia ki Managing Committee jong ki skul Adhoc ba kin syniang lem sha ka grant ba la ai da ka Sorkar Jylla naka bynta ka bit ka biang jong ki Nonghikai bala thungkam da ma ki.

Kane ka jingkyntu kala mih hadien ba ki Nonghikai Adhoc kiba don ha ka lama jong ka Federation of School Teachers of Meghalaya (FASTOM) kila rai ban pynjur ia ka jingiakhih pyrshah ia ka jingpynslem ka Sorkar ban pyntreikam ia ka jingdawa pynkiew ia ka tulop da T. 18000 bad 5% ka increment manla u snem.

Haba iakren bad ki nongthoh khubor, u Bah Prestone ula ong ba ki Nonghikai Adhoc ki dei kiba la thungkam da ki Managing Committee jong ki skul (SMC) bad kumta ka SMC ka dei ban wan shakhmat bad leh eiei ia ka jingeh jong ki Nonghikai skul.

“Ai ba ki SMC ruh kin syniang lem namar kane ka dei ka grant bala ai da ka Sorkar Jylla. Nga kwah ban kyntu sha baroh ki SMC ba phi donkam ban pan ia ka jingpynshai na ki Nonghikai balei ba kim shym la leit shim klas ia ki khynnah. Ki dei ruh ban shim ia ka jingbahkhlieh lada ki nonghikai jong ki, ki pep skul bad dei ruh ban leh eiei pyrshah ia ki” ula ong.

Haba kyntu ia ki Nonghikai ba iakhih ba kin pynsangeh noh ia ki jingiakhih, u Bah Prestone ula ong “ Nga kyntu ia baroh ba kin leit phai noh shala ki jong ki skul, sdang biang ban shim klas, pyrkhat iala ki jong ki khynnah skul namar kam don jingmyntoi eiei da kaba shong hangtei. Phi lah ban shong hangtei 4-5 miet hynrei ngi la dep ban aiktien ia ka rai jongka Sorkar. Nga kyrpad ia ki ba sngewbha leit phai noh shala ki jong ki skul bad ka Sorkar kan sa shim rai shen ia kane ka kam jong phi”.

U Symbud Myntri Rangbah ula ong ruh ba u Myntri ka Tnad Pule Puthi ma Lahkmen Rymbui ula dep iakynduh ia ka kynhun jong ka FASTOM bad dep aiktien ia ka rai jong ka Sorkar ba ka jingpynkiew ia ka grant kan sa urlong noh.

“Ngam peiphang balei kine ki nonghikai kim pdiang ia ka jingaiktien jong u Myntri ka Tnad Pule Puthi, nga da lyngngoh shisha” ula ong haba pyntip “Ka Kynhun Myntri kala dep iakren la arsien ia ka kam jong kine ki Nonghikai bad ka dang donkam ban shong sa shisien ban shim ia ka rai kaba khatduh”.

“Haba ngi don ia ki mat ba kongsan kum ka jingpynkiew ia ka tulop na adhoc grant, u Myntri ba dei khmih u ju don lang ha ka jingialang jong ka Kynhun Myntri hynrei namar ki bym lah kiar, ha kato ka sngi u Myntri ula leit sha Delhi ba don ka jingialang. Hynrei kane kam dei ka daw naba ki dang don kiwei pat ki jingkwah jingshai jong ka Kynhun Myntri kaba hap ban leit phai biang sha ka Tnad Pule Puthi, ka tnad Planning bad Finance” ula bynrap

U Symbud Myntri Rangbah ula ong “Nga thikna ba ha ka jingialang ban wan jong ka Kynhun Myntri ngin sa lah noh ban shim ia ka rai”.

Share post:

spot_img
spot_img

Popular

More like this
Related

Gherao ki BSF ia ka Umkiang Police Patrolling Post ba shah kem ki shipai jrong kti ia ka Khynnah

Shillong, Jylliew 21 : Ka kynhun ki shipai Border...

Meghalaya Secures 300 Acres for Umiam Tourist Hub, Plans Helicopter Services

Shillong, June 20: Chief Minister Conrad Sangma chaired a...

Liem ka Champion haka Christian HSS | Ïoh ka Ri-bhoi ïaki Skul ban mihkhmat sha State Level

Nongpoh, Jylliew 19: Ka lympung ïalehkai ball jong ka...

Bei ka World Bank palat T.11 lak tam ban tei NRM Library ha Nongshillong

Nongstoiñ, Jylliew 20: U Piyush Dogra u stad mariang...
spot_img