Shillong, Jylliew 30: U Director General of Police (DGP) ba thymmai ka Jylla Dr L.R Bishnoi hynne ka janmiet, ula hiar leit jngoh ia ka thain Motphran-Jaiaw ban peit ia ka jinglong jingman ha kane ka thain khamtam na ka jingmih ki jingjia shah shoh klep jong ki bar Jylla kiba jia khari khari ha ka thain.
Ia une u Khliehduh ka Tnad Pulit ka Jylla (Meghalaya Police) la synran da ki Superintendent of Police ka East Khasi Hills bad kiwei ki heh Pulit ka District.
Shuwa kane, une u Hehduh ki Pulit ula hiar leit jngoh ia ka thain Police Bazaar bad nangne ula iaid da ka kjat sha ki thain Jaiaw ban peit ia ka jinglong jingman kine ki jaka bad ban iakynduh ruh ia ki nongshongshnong ban sngap ia kaei ka jingeh ba ki don haba iadei bad ka shongsuk shongshngain bad ka jingshakri jong ki Pulit ka District.
“Ka jingjurip ka jong nga, ka dei da ka jingthmu ban iakren bad ki nongshong shnong ban sngewthuh ia ka jingeh jongki bad ban khmih bniah ia ka jinglong jingman ha kaba iadei bad ki bor pahara. Lada i donkam, ngin nang pynkhlain ia ki bor pahara” ong u Dr LR Bishnoi haba iakren bad Ka Shlem.
Une u Heh Pulit ula ban jur ia ka jingdonkam ban pynkhlain ia ki bor pahara khnang ba ki riewshimkabu kin ym iohlad ban thaw ia kino kino ki jingkulmar kiba lah ban pynkha ia ka jingthut ka shongsuk shongsain.
Haba kylli, u Dr Bishnoi u iathuh ba ka jingjurip ruh ka long halor ka jingioh pdiang ia ki jingujor na ki paidbah haba iadei bad ka jingjyllei ka kam khaii droks bad ka jingdih droks kaba la wanrah ia ka jingbym sngewsngain ha ka leit ka wan bad ter ter.
“Shen ngan sa lum ia ka jingialang bad ki Rangbah Shnong ban sngewthuh ia ki jingeh kaba ki iakynduh bad ban ioh ruh ia ka jingiatreilang na ki bor pyniaid shnong ha kaban iakhun pyrshah ia ki kam bymman ha ki shnong ki thaw” ula ong.
Halor ki jingjia iashoh iadat ba man ka por, u DGP ula ong “Nga kyntu ia ki samla ba kidei ban pynleit jingmut ialade haka pule puthi ym ban donkti ha kino kino ki kam be-aiñ bad lada ki mad ia kino kino ki jingeh kidei ban leit iakynduh ia ki heh pulit ne ia ki bor kiba dei khmih bad ngin pyrshang katba lah ban ai jingiarap ia ki”.
Une u Khliehduh ki Pulit ula leit rung ruh sha Them Metor bad ula ioh iakren bad ki Harijan ba sah ha kane ka jaka hashuwa ba un kiew sha Motphran, Mission Compound bad hiar sha Jaiaw.
Ha Jaiaw, u DGP ula ioh iakren bad ki paidbah kiba don ha surok bad kumjuh ruh ia ki nongshong dukan nalor ki katto katne ki Dkhot ka Khasi Students Union (KSU) kiba iengkai hajan ka Ophis treikam lajong.
