Kyntu u DyCM ia ka Mawphlang | Jied biang ia u Chairman ka KHADC kum ka burom ia ka NPP ba pynurlong ia ki jingkular

Kynnoh bamsap ka VPP ia ngi hynrei ujor ejahar pat tang ia Social Media ba kren pyrshah VPP

Shillong, Rymphang 17 : U President ka National People’s Party (NPP) bad Symbud Myntri Rangbah Bah Prestone Tynsong ha ka sngi Nyngkong, ula kyntu ia ki paidbah ka Mawphlang-Diengiei ban jied biang ia u MDC ba mynta bad Chairman ka KHADC Bah Lamphrang Blah kum ka dak ka jingburom ia ka Party (NPP) namar ka jingpynurlong ia baroh ki jingkular jong ka constituency.

Haba kren ha ka rynsan ialap elekshon ha Mawngap, u bah Prestone ula ong “Ngi la pynurlong ia baroh ki jingkular jong ngi ha ka elekshon bala dep la ka dei ka surok, sub division, college bad hospital. Nga tip ba ki dang don bun ki kam ba hap leh hynrei nga kyrpad ia phi ba kum ka jingburom ia ka NPP bad ia nga kum u President ka party ha Jylla, ba phin ai ia ka jingkyrshan ba pura ia u Bah Lamphrang Blah, uba la shah jied la saw samoi kynthih. U dei u nongialam uba la ih bha”.

“U Bah Blah u khlem jop ia ka elekshon MLA. Nga la wadbniah bad nga sngewthuh b aka dei namar ba u dei u MDC. Nga I kumba ngi donkam la ka jong u MDC bad MLA. Kumta, ngi dei ban ailad biang ia u sa shisien namar u dei uba la tbit bha (specialist) mynta bad ula bat ia shibun ki kam hapoh KHADC” ula bynrap.

Halor ka jingkynnoh high-level pyrshah ia ka NPP, u Bah Prestone ula ong “Ki (Liang Pyrshah) la pynmih ia kum kine ki jingkynnoh la kumba ki don ia ki sakhi. Ngam pat ju iohi ia ki ba kin leit ban ujor ejahar pyrshah ia u Prestone ne Conrad ne ki Myntri hynrei ki nang ban ujor ejahar tang ia kito kiba kren pyrshah ia ki ha ki social media. Kane ka dei tang ka jingpynsyrwa kai ia ka por namar kim lah ban ioh ia ka vote jong ki. Ki shu kut ka kren baheh hynrei nga ong ba lada phi nud ban byrngem ujor mukotduma pyrshah ia ka Dorbar Shnong, kan eh aiu ia ngi?.

Haba pynpaw ba ka Sorkar kam lah satia ban pynkhein ia ki rule pyndonkam ia ka pisa tyngka, u Symbud Myntri Rangbah ula ong “Ka Sorkar India ka don ia ka CAG, ka bym ju map iano iano ruh kiba donkti ha ki kam bamsap. Kumta, wad ia ka jingshisha ha ka jaka ban ngeit ha ki kam thok jong ki kynhun pyrshah”.

Haba thwe ia ka Liang Pyrshah Voice of the People Party (VPP), u Bah Prestone ula ong “U Nongia lam ka UDP ula kdew ia kaba dei eh haba u ong ba ki don tang 4 ngut ki MLA hynei ka jingiashrut hapoh ka party ka jur bha. Shu mutdur ba lada ki don 32 ngut ki MLA, nga tharai kane kan dei ka jingsdang jong ka thma bah balai”.

Haba kyrpad ia ki paidbah ba kin nym shah ialam bakla ha ka Liang Pyrshah (VPP), u Bah Prestone ula ong “Ngi la kut jingmut hok ban wanrah ia ka roi ka par ha man la kawei pa kawei ka constituency. Ka EC ba ialam da ka NPP ha KHADC kala thaw histori da ka jinglah ban pynioh ia ka jingmynjur u Lat ka Jylla ia 7 tylli ki Bill. Kane kala wan jia namar ki ADC bad ka Jylla kila iatreilang”.

Haba kren halor u soh ka jingtreikamjong ka Sorkar MDA ba ialam da ka NPP, u MLA barim ka Mawsynram Bah Himalaya Shangpliang ula ong “Palat 2000 ngut la thungkam ha ka Tnad Pulit. Mynta u snem, ngin nang thungkam shuh shuh ia ki Pulit hapoh ka Tnad”.

Haba kyntu ia ki paidbah ba kin shaniah ha ka NPP, ula ong “Ka party kam don por ban kynnoh iano iano ruh namar ka bunkam ban wanrah ia ki kam pynroi sha ka Jylla”.

U Bah Himalaya ula ong ba ka Meghalaya kan sa ioh haduh 1 lak tylli ki Iing na ka bynta ki longiing ba duk ha une u snem ba mynta.

“Shen ngin sap lie noh ia ka Science College bad ka jingthungkam ia ki nonghikai kan sa sdang noh. Ka dei ka college Sorkar bad ka bai klas kan dei kaba duna bha. Kane kala urlong namar u Bah Lamphrang Blah, uba la long ka pyrnon hapdeng jong phi bad ka Sorkar. Ula wan iakren ia ka Sorkar bad ka Sorkar kala ai ia kine ki kam pynroi. Kumta, phin sa babe lada phim jied biang ia u kum u MDC” ula bynrap.