Shillong Lber 07: U Symbud Myntri Rangbah ka jylla ba khmih ia ka tnad District Council Affairs Bah Prestone Tynsong, ula kyntu ia ka Khasi Hills Autonomous District Council (KHADC) ba kadei ban pynlong man la u snem ia ka Monolith Festival namar bun ki kwah ban iohi bad tip shaphang ka jinglong tynrai jong ki paid Khasi.
“Kawei kaba nga sngewtynnad ia kane ka festival ka dei ka jingkhawai kyrpang, ka jingleh kyrpang halor ka jingriewspah jong ngi ha ka kolshor, ka niam ka rukom kaba la buh beit buh ryntih da ki menbarim” ong u Bah Prestone haba kren kum u Kongsan ha ka jingplie ia ka Monolith Festival ha Khasi Heritage Village, Mawphlang hynne ka sngi Palei.
Ula kyntu ba dei ban pynlong ia kane ka Festival man la u snem namar bun bah kiba kwah ban iohi bad ban tip ia ka jinglong jingman jong ki ritpaid bad ki kwah ruh ban da thoh da ki kot bad ban pyni nuksa sha ka pyrthei baroh kawei.
Ula ong, “Ka sorkar ka iatrei ryngkat ryngkat bad ki 3 tylli ki District Council ha ka jylla namar ba ngi shem ba dei lyngba kine ki 3 tylli ki District Council, ngi ki ritpaid ngi iai neh iai sah, ngi iai bit iai biang ba ioh jingiada na ka Riti Synshar ka Ri lyngba ka Sixth Schedule”.
“Don ki briew kiba pyrkhat ba ka District Council mynta ki por kam don jingmut shuh, nga iohi ha ki lad pathai khubor ba ki iatai ba ka District Council kam don jingmut shuh, hynrei nga kwah ban ong ia phi ba kata ka dei ka jingsngewthuh kaba bakla. Ngeit ia nga ba dei lyngba jong kane ka tnad treikam kaba la pynkup bor da ka riti synshar ka ri India, ba ma ngi kumne ngi long hapoh ka jylla Meghalaya bad nga kyntu bad kyrpad ia baroh ki 3 tylli ki District Council ba kin nang pynkhlaiñ ia ki aiñ ki kanun kaba ka riti synshar ka ri kala ai ha phi ban iada ia ka Jaidbynriew”.
Ha kaba iadei bad ka jingkam ki katto katne ba ka jaidbynriew kala don ha tmier riat, u Bah Prestone ula ong, “Lyngba jong ka Sixth Schedule, lyngba jong ka District Council ngi long kiba shngain bad ngin iai neh kumba ngi long ha la ka jong ka riti ka dustur, ha la ka jong ka niam ka rukom, ha la ka jong ka jingngeit ka jong ngi marwei marwei bad ai ba kane ka Festival kan nang plie shuh shuh ia ka jingmut jingpyrkhat jong ki samla jong ngi”.
U Bah Prestone ryngkat bad u CEM ka KHADC u Bah PS Syiem bad kiwei kiwei, kum ka jingplie ia kane ka Tamasa kila thang ia ka Dongmusa bad kila pyllait paidbah ruh ia ki kot bapher bapher.
Ha kane ka tamsa la iadonlang ki MLA, MDC, ki khlieh nongsynshar shnong na kylleng ka rilum Khasi bad ki paid na ki jaka bapher bapher.
Kane ka Tamasa kan kut ha ka sngi Saitjaiñ ha kaba u Myntri Rnagbah ka jylla u Conrad K Sangma yn wan ban pynhap pyrda ia kane ka tamasa kaba 3 sngi kaba la pynlong da ka KHADC ha ryngkat ka jingiatreilang bad ka Tnad Tourism jong ka jylla.
Ki heh ki haiñ bad ki kynrem ki lyndna kila leit ruh ban jngoh ia ki ïing jong ki Hima kiba tei ha katei ka jaka, ka Museum, kila leit iaid ruh ia ka jingkieng kaba la shna kyrpang bad leit jngoh ia ki dukan kiba die ia ki tiar tynrai, ki jain tynrai, ka bam ka dih tynrai bad kiwei kiwei.
 ba kadei ban pynlong man la u snem ia ka Monolith Festival namar bun ki kwah ban iohi bad tip shaphang ka jinglong tynrai jong ki paid Khasi.){kind=link}