Shillong, Nohprah 19 : U Symbud Myntri Rangbah ba khmih iaki kam pohiing (Police) Bah Prestone Tynsong, ula kyntu ia ka seng Hynniewtrep National Liberation Council (HNLC) ban mynjur ha kaban wan biang sha ka jingiakren iasuk ba khlem buh kyndon bad ka Sorkar.
“Nga dalade bad na ka bynta ka Sorkar, nga kyntu ia ki (HNLC) ba kin wan phai biang sha ka jingiakren iasuk” ong u Bah Prestone ha ka sngi Ba-ar.
“Naba ha ka shithi (sha ka Sorkar), ki (HNLC) la pdiang bad mynjur ban iakren hapoh ka miej jingiakren khlem ka jingbuh kyndon, ngi kwah ruh ia ki ba kin wan phai biang sha ka jingiakren ba khlem buh kyndon. Watla ngi hap ban leh haduh san ne shiphew sien, ngi long kiba kloi ban iakren” ula kular.
U Bah Prestone ula ong ba ka long kaba sngewsih ba ka wat ba nyngkong jong ka jingiakren kala shu kut kumto (hadien ba ka HNLC kala rai ban mih noh na ka jingiakren iasuk ba lai liang mamla bad ka Sorkar).
“Hynrei, ai ba ngan iai ban ba ka jingkhang jong ka jingiakren ka dang plie bad na ka liang ka Jylla bad ka Sorkar Pdeng, ki long kiba la khreh ban pynlong ia ka jingiakren (khlem ka jingbuh kyndon). Nga sngew skhem ba baroh ki kynhun kin lah ban wan biang sha ka jingiasngewthuh jingmut lyngba kine ki jingiakren” ula bynrap.
Haba kylli, u Bah Prestone ula ong “Ia mynta, ka Sorkar Jylla ka dang ap ia ka jubab na ka HNLC”.
Ula bynrap ba wat hapdeng ka rai ba dang shen ban pynjlan ia ka jingkhein beain pyrshah ia ka HNLC, ka Sorkar Pdeng ka dang kwah ban don ka jingiakren iasuk bad ka kynhun.
“Watla kila pynjlan ia ka jingkhein beain, ha ka juh ka por, ka Sorkar India kala ong wan sha ka jingiakren bad ngi long kiba kloi ban leh ia kata” ong u DyCM.
 Bah Prestone Tynsong, ula kyntu ia ka seng Hynniewtrep National Liberation Council (HNLC) ban mynjur ha kaban wan biang sha ka jingiakren iasuk ba khlem buh kyndon bad ka Sorkar.){kind=link}