Kyntu u Director ia ki Nongtrei SSA ba iakhih ban sdang leit trei noh iala ka kam

Shah ktah ka jingsiew tulop ia ki Nonghikai

Shillong, Nailar 14 : U State Project Director ka Samagra Shiksha Abhiyan (SSA) Swapnil Tembe ha ka sngi thohdieng, ula kyrpad ia ki nongtrei SSA ba kin sdang biang ia ka kam jong ki namar ba ka Rationalization Committee ka la don lypa ha ka kam ban pynbeit ia ki jingdawa ban pynkiew tulop.

Kat kum ka jingong jong u, ka jingïakhih shong kyllain mungor jong ki nongtrei SSA ha kine 15 sngi ba la dep, ka la ktah jur bha ïa ka jingpyllait tulop sha palat 10,000 ngut ki nonghikai SSA.

“Kumta, namar ba ka Rationalization Committee ka la don lypa ha ka kam, ka long kaba kongsan ba ki nongtrei ki bym dei ki nonghikai, kin sdang leit trei noh bad ki kam hapoh ka prokram kin ïaid beit kumba la thmu,” ong u Tembe ha ka kyrwoh.

U la ong ba wat hapdeng kine ki jingai jingmut, ka jingshong kyllain mungor jong ki nongtrei ka dang ïai bteng kaba pynlong ïa ka jingpynslem ban pyllait ïa ka tulop jong ki nonghikai, ban pyntreikam ïa ki jingïarap bapher bapher katkum ka SSA bad ban pyntrei ia ki prokram jong ka Rights to Education (RTE) kum ka jingai ïa ka uniform grant, ka library grant ki school grant bad kiwei kiwei.

“Ki don palat shiphew hajar ngut ki nonghikai SSA ki bym shym la lah ban ïoh ïa ka tulop jong u bnai Jylliew haduh mynta namar kane ka jingshong kyllain mungor. Hynrei, ngi la shim khia ban pynbeit ïa kane bad ban wanrah da kawei pat ka lad ka lynti” u la ong.
Lah ban kdew ba dang shen, ka Sorkar kala ai jingmynjur ban pynkiew 25% ka tlop ia kaba ym shym la pdiang satia da ka seng jong ki nongtrei SSA bad hadien kata ki la iai bteng beit ia ka jingiashong kyllain mungor.

Ki nongtrei bym dei ki nonghikai ki la dawa ban pynkiew ia ka tulop haduh 80 percent.
Hadien kata, ka sorkar jylla ka la thaw ia ka Rationalization Committee kaba la khlieh da u Commissioner & Secretary, ka tnad pule puthi ha ryngkat ki nongmihkhmat na ka seng bad ka la dep ban don 3 tylli ki jingialang ban iakren ia ki jingeh jong ki bad ban wanrah ia ka rukom pynshong nongrim ia ka tulop.

U Tembe u la ong ba ka Rationalization Committee ka la peit bniah ia ka jingsiew tulop jong baroh ki nongtrei hala ki jong ki jong ki kyrdan hapoh ka Jylla, ka District bad ka Block bad ka la iohi ba ki nongtrei jong ki block ki donkam ia kaban hap pyrkhat bha ban ia kiwei pat ki kyrdan bad nangta ban pynshong nongrim ia ka jingsiew tulop kat kum ka jingjrong jong ka jingshakri.