Shillong, Nailar 14 : Ka Khasi Students’ Union (KSU) ha ka sngi Balang, kala ioh bat haduh 24 ngut ki suba nong Bangladesh na khappud ka South West Khasi Hills District bad ka Bangladesh.
“Naba ki dei kiba la suba jur kum ki nong Bangladesh hadien ba kim lah ban pyni ia ki kot ki sla kiba biang, ka KSU Ranikor Circle kala aiti noh ia kine ki briew sha ki Pulit ban leh ia kaba donkam” ong ka kyrwoh bala phah da ka KSU.
Ka KSU kala kyntu ia ki shipai BSF, ka Tnad Pulit bad ki bor pyniaid District ka South West Khasi Hills ba kin shim ia ki lad ki lynti kiba donkam ha kaban khanglad ia ka jingrung beain ki nong Bangladesh sha India khamtam haba iohi ia ka jinglong jingman ka suk ka sain ha katei ka Ri ba marjan.
“Ngi ai ruh ka jingmaham kaba tyngeh ia ki contractor bad ki nongaikam kiba wanrah nongbylla da ki nong Bangladesh” kala ong.
Ka KSU kala maham ban leh tyngeh lada ki BSF bad ki bor ka Sorkar Jylla kim lah ban shim ia ki sienjam ban khang ia ka jing rung beain ki nong Bangladesh ha Jylla.
