New Delhi, Risaw 17 : U Myntri Rangbah (CM) ka Assam u Himanta Biswa Sarma ula kyntu ia ka Northeast Frontier Railway (NFR) ba kan pyndonkam da ki lad jingstad teknoloji khnang ban khanglad ha kaba iadei bad ka jingiap jong ki hati na ka jingiatyngkhuh bad ki rel.
U CM Sarma ula pynmih ia kane ka hukum ha ka jingialang bad ki heh sorkar ban iamir jingmut halor ka jingpyniar ia ki projek bapher bapher ha kane ka sngiSaitjain ba la lah. Ha kane ka jingialang la ia don lang ruh u general manager ka NF Railway u Ansul Gupta.
Ia ki mat kiba iadei bad ki lynti iaid ba kyrpang na ka bynta ki hati bad halor ka jingiap jong ki hati namar ka jingshah tynrah ha ki rel la iakren ha kane ka jingialang. La kyntu ruh ia u GM ba un pyndonkam da ki tiar teknoloji kiba khlain khnang ban lah ban aijingiada ia ki jati ki jong nhi, ” Pynpaw u CM Sarma lyngba ka twitter hadien katei ka jingialang.
Na ka por sha ka por ki hati kila shu mynsaw bad iap ei lyngba ki rel kiba pynher sted namar ki lynti rel ki iaid lyngba ki lynti iaid jong ki hati ha kiba bun ki bynta hapoh Assam.Haduh laitylli ki mrad rben snieh kila duh ei la ka jingim ha kina kum kitei ki jingjia ha Jorhat district tang ha kane ka taiew ba la lah.
Haba pynshai halor katei ka jingialang, u Sarma ula ong ba ula iamir jingmut halor ka jingpyniar ia ki lynti iaid rel kiba la don lypa kumjuh kiba thymmmai ha ryngkat u GM k NF Railway u Ansul Gupta, u MD ka ASTC (Assam State Transport Corporation) u Rahul Chandra Das lem bad ki heh sorkar ba halor jong kine ki artylli ki tnat treikam.
U CM ula ong ruh ba ka sorkar jong u kan pynioh jaka na ka bynta ka tnat NF Railway na ka bynta ban shna ia ka jaka rung kaba ar shapoh Guwahati Railway Station na ka liang ka Paltan Bazar.
“Na ka bynta ka jingpyniar ia ki jingtei happh Agthori Railway Station ngin pynioh ia ka jaka tad ynda ngi la ioh pdiang ia ka jingkyrpad na ka NFR,” ong shuh shuh u Sarma.
