Shillong, Nohprah 08: “Kam dei man ka sngi ba phi ioh ia u Myntri Rangbah hangne ban iakren bad phi. Kane ka dei ka kabu ba phin iathuh ha ngi ia ki buit treikam, ki jingeh ba phi iakynduh, bad sa kiei kiba ka Sorkar ka lah ban leh ban kyrshan ia ki jingangnud jong phi” ong u Myntri Rangbah Conrad K Sangma sha ki briew kiba don jingduna dkhot met (PwD) ha ka jingiakren markhmat ha Dkhiah West ha ka sngi Nyngkong.
U Myntri Rangbah ula kren ia kane haba plie ia ka bynta ba nyngkong jong ka hostel ka Ephatha Society ha East Jaintia Hills, ka jaka ka ban iarap bad ai jingkyrshan ia ki briew kiba don jingduna dkhot met.
U Myntri Rangbah u la sam ruh ïa ki Two-Wheeler Handicap-Friendly Mobility bad kiwei ki lad jingïarap bad u la iashim bynta ruh haka jingïakren bad ki briew kiba don jingduna ha ki dkhot met bad ki dkhot jong ka Ephatha Society.
U Myntri Rangbah u la bynrap daka ba ong ba ki jingmut ba kongsan kin long na ka bynta kiwei pat ki briew ba duna dkhot met (PwD) ha ka Jylla.
U la ïathuh ruh ba yn sa shim noh mardor ban shna iaka surok pyniasoh shaka Hostel bad ïa ki jingdonkam ba dang sah jong katei ka Hotel ruh yn sa pyndep noh shen.
U la pyntip ruh ba ka wat ba ar, un shimkhia ban kyrshan na ka bynta ki kam kiba kham shakhmat kum ka Framing, ki Skill bad kiwei ki kam ban kyntiew iaka kamai ka jih jong ki.
Haba pynkut ia ka jingkren u Myntri Rangbah u la ong “Wat sngew ba phi long kiba poh kyrdan ban ia kiwei pat ne ba phi long kiba duna bor ngi don hangne ban kyrshan ia phi, ban jop ia ki jingeh jong phi bad ban iaid shakhmat ha ka jingim.”
Haka jingiakren bad kiba duna dkhot met, u Myntri Rangbah u la ioh sngew iaki jingeh ba kila pynsngew ha u bad u la kular ruh ban shimkhia mardor bad ban iarap iaki.
Ia ka Ephatha Society la seng ha ka 2 tarik Nohprah 2020 da ka jingthmu ban plie ia ki lad lynti bad ban kyrshan ia ki briew kiba duna dkhot met.
Naduh ba la seng ia ka Ephatha Society, ka Society kala pynlong shibun ki program kum ki surveys, seminars, jinghikai pyntbit, ki jingialap pynsngewthuh paidbah bad kiwei de ki training.
Ka Inclusive Training Centre jong ka society kaba dang sdang mynta kan ai ki jaka ba kyrpang na ka bynta ki khynnah bad ki rangbah kiba duna dkhot met kynthup ka jinghikai ha ka kam suh jain bad kiwei kiwei ki kam pynroi ha ka jingtbit.
Ha kane ka sngi la donlang u MLA ka Khliehriat constituency u Bah Kyrmen Shylla.
