Shillong, Jymmang 02 : U Myntri Rangbah ka jylla u Conrad K Sangma hynne ka Sngi Baar ula kyntu ia ki nongshong shnong ka jylla ba ki shim ia ki lad jingiada na ka khlam COVID-19 ban tehlakam ia ka jingsaphriang jong kane ka jingpang.
Haba iakren bad ki nongpathai khubor halor ka jingkiew ka jingiohpang COVID-19 ha ka jylla, u Myntri Rangbah ula ong, lada ki paidbah ki sngewshitom malu mala ruh kidei ban shim ia ki lad jingiada ban tehlakam ba kin ym pynsaphriang ia ka jingpang sha kiwei pat.
Ula kubur ba kala don ka jingkiew ha ka jingioh iaka jingpang COVID-19 bad ula kyntu ia ki nongshong shnong ba kin bteng ban bud ia ki kyndon jingbthah da kaba deng iaka mask, ban ieng jngai na kiwei pat bad ban long kiba lehkhuid lehsuba.
“Ngi lah iohi ia ka jingkiew jong ka jingioh ia u COVID, kumta ka jingleh ia ki test kala iaid shakhmat. Kiei kiei ki sabut kiba ngi la iohi ha ki bnai kiba la dep bad taiew bala dep, la shem ba u COVID ym da long uba khlain bor kum ha ki bnai kiba la dep.Kane kala pynsting jingmut ia ngi namar ba ym dei eh uba ma haduh katta katta ban ia u COVID ha ki snem ba la dep” ong u Conrad.
“Nga kyntu ia ki paidbah ba watla ym shim la pyrkhing tyngeh ia kino kino ki kyndon ain ne ban ai ia ki jingmana kiba eh, hynrei lada long kaba lah, dei ban shim ia ki lad jingiada ban kiar ban leit sha ki jaka kiba bun briew, ban deng ia ka mask bad ban shim ia ki lad jingiada. Ia kine kiei kiei dei ban leh da ki paidbah khnang ba ngin lah ban shimkhia bad ba ngin pynthikna ba kin don ki jaka kiba kongsan bad ba ngin long kiba la kloi ban iakhun ia kino kino ki jingeh kiba mih” ula bynrap.
