Guwahati, Jymmang 02 : Uwei u shipai Indian Army ula duh noh iala ka jingim ha ka jaka hikai siat suloi ha Darrang, na ka jingmih ka jingbthei katba u dang ap pahara ia kane ka jaka ha ka sngi nyngkong.
Une u shipai uba iap u kyrteng u Sandeep Kumar. Une u shipai ula mynsaw jur na kane ka jingbthei bad la pynkit la pyntah dawai mar mar ia u ha kane hi ka jaka da u Regimental Medical Officer ba don ha kane ka jaka hikai siat suloi.
Ia u Kumar la pynkit noh da ka helicopter sha ka Hospital ha Guwahati hynrei ula khlad noh na ka jingmynsaw.
U Sandeep Kumar u dei na Mandi District ha Himachal Pradesh bad ula ieh shadien ia ka Kurim bad uwei u Khun ba dang shisnem.
Ka India Army kala pynpaw ia ka jingsngewlem halor kane ka jingjia bad kala hukum ban pynlong ia ka jingtohkit halor ki daw ba mih kane ka jingbthei.
