Shillong, Rymphang 25 : U Myntri Rangbah ka jylla u Conrad K Sangma hynne ka sngi Baar, ula iashimbynta ha ka Training Programme ban pynrung kam ia ki 35 ngut ki Meghalaya Civil Service (MCS) Officers, Batch 2025 ha ka jingialang kaba la long ha Meghalaya Administrative Training Institute (MATI), Shillong.
Haba ai jingkren sha kine ki ophisar kiba thymmai, u Myntri Rangbah ula ai khublei ia ki halor ka jingshah jied bad ula pynkynmaw ruh ia ki halor ka jingkitkhlieh bad ka jingthmu jong ka kam shakri paidbah. Ula kyntu ia ki ba ki dei ban peit ha ka dur kaba iar bad ban trei naduh mynsiem, da ka jingjaijai bad da ka rukom kaba buh shwa ia u paidbah hakhmat.
“Phin jam sha ka kyrdan ban bat ia ka bor, hynrei ka jinglong nongialam ka dei na ka bynta ban shakri ym na ka bynta ka bor. Ka rai kaba phin shim kan dei ka ban ktah ia ka jingim ki briew. U khulom uba phi bat u kham khlain ban ia ka waitlam, kaba lah ban ai ia ka jingbishar kaba hok, ban pynbeit ia ki jingeh bad ban wanrah ia ka jingkylla, pyndonkam bha da ka jingshemphang” ula kyntu.
U Myntri Rangbah ula ban jur ruh ia ka jingkongsan ban long kiba don akor, ba long ryntih, ban iadei bad baroh bad ula kyntu ia ki ophisar ba kin iengskhem ha ka nongrim ka jongki wat hapdeng ba ki mad ia ki jingeh bad ki jingtynjuh. Ula kyntu ruh ia ki ba ki dei ban bat ia ki kam kiba eh ne jwat da ka jingmut bad ka jingpyrkhat kaba bha, da kaba shim ia ki jingeh kum ki lad ban nangkiew shaphrang.
Ula pynshlur ruh ia ki ophisar ba kin pule bad ban sngewthuh ia ka kot Meghalaya Vision 2032, kaba buh ia ki thong kiba kongsan ha kaba iadei bad ka roi ka par, kynthup ia ka jingbuh thong ka jylla ban long kum ka jylla kaba don ha ka kyrdan kaba 10 ha ka GDP Rangking jong ka ri India.
Ula ban jur ia ka jingdonkam ban bteng ban pule, da kaba ong, “Ka jingioh jinghikai ka jong phi kan ym kut noh tang hangne. Man la ki kyrdan kiba phi ioh ban bat ne trei kan long kum ka lad ba phin ioh ia ka jinghikai. Long kiba don ia ki jingtip kiba thymmai, sngewthuh ia ki skhim jong ka sorkar bad man la ka por pyrshang beit ban thaw ia ki lad ki lynti ban wanrah ia ka jingkylla kaba shisha”.
Ka Director General jong ka MATI, ka Kong R.V. Suchiang, IAS (Retd.), kala kren shaphang ki jingeh bad ka jingkitkhlieh jong ki ha ka kam shakri paidbah bad kala pynkynamw ia kine ki ophsiar kiba ioh jinghikai ba ka jingdon ia ka nongrim bad ia ka akor ka burom ki long ki bynta kiba kongsan tam ha ka kam shakri paidbah.
“Kin don ki por kaba phin hap ban jied hapdeng kaei kaei kaba suk bad kaei kaba dei. Jied da ka jingshemphang, namar ka jingjied da ka lynti kaba lyngkot, kan lam sha ka jinghiar jong ka jingtbit ka jong phi” kala ong.
Katba u Additional Chief Secretary u Shakil Ahmed ula kren iaka jingdonkam ban long kum ki nongialam kiba khlain bad kiba lah ban shim ia ki rai kiba kongsan.
“Ka jingjop ka jong phi kum ki nongpyniaid ia ka kam, kan shong eh ha ka jinglah ka jong phi ban sngap, ban iadonbynta bad ban leh khlem ka jingshah liang” ula ong.
Ha kane ka prokram la wan ban iashimbynta da ki heh ophisar ka jylla kiba kynthup ia u Commissioner & Secretary ka Tnad Personnel bad kiwei kiwei ki heh ki hain.
 Officers, Batch 2025 ha ka jingialang kaba la long ha Meghalaya Administrative Training Institute (MATI), Shillong.){kind=link}