Rakhe ia Jylla iaka sngi ialeh pyrshah ia u droks
Shillong, Jylliew 26 : U Myntri Rangbah ka Jylla Conrad K Sangma, ula kyntu iaka Tnad Meghalaya Police ba kan iai bteng ban trei borbah ha ka ban tehlakam bad ratdyngkhong ia ka jingjyllei jong u droks hapoh ka Jylla.
U Myntri Rangbah ula pynpaw ia kane ha ka jingrakhe ia ka International Day Against Drug Abuse and Illicit Trafficking ba la pynlong da ka Tnad Meghalaya Police ryngkat bad ka Tnad Social Welfare hynne ka sngi Nyngkong ha U Soso Tham Auditorium, Shillong.
Haba ai jingkren, u Myntri Rangbah ula ai ka jingiaroh iaka Tnad Pulit halor ka jingiohkem ia ki nongkhaii droks bad ioh kurup ia u droks da ki klur tyngka ha kine ki khyndiat bnai bala leit noh.
“Nga kyntu ia ka Tnad ba kan iai trei ia ka kam ha kaban tehlakam bad ratdyngkhong ia ka jingdih droks hapoh ka Jylla” ula ong haba bynrap “Katba ki bor Pulit ki dang trei iala ka kam ngi donkam ban pynthikna ba ki 40,500 ngut ki samla kiba shaniah tylli ha ki droks kin ioh ia ka jingsumar da ka jingieid khnang ba kin wanphai biang sha ka imlang sahlang kum ki nongshongshnong kiba don jingkitkhlieh bad kiba tei”.
U Myntri Rangbah ula pyntip ba ka Sorkar kala pyrshang katba lah ban pynthikna ba ka Jylla Meghalaya kan lait na u droks. “Ki Policy bad ki prokram jong ngi ki dei kiba la pynwandur ha ka rukom ba ngi buh ia ki briew kiba dei hapdeng eh bad kane ka sienjam ban don ia ka kynhun ba kyrpang ban iakhun ia ka jingkhaii bad jingdih droks, ka dei shibynta na ki buit treikam ban iakhun pyrshah ym tang ia u droks hynrei na ka bynta ka bha ka miat ki samla jong ngi”.
Ula ong ba ka jingrakhe ia ka International Day Against Drug Abuse ka dei shibynta naka pla ban pynthikna baka Jylla kan lah ban sei ia ki samla kiba koit ba khiah, kiba long ki nongtei bad kiba don ha jingkitkhlieh naka bynta ka lawei jong ka Jylla.
“Baroh ki prokram kam pynroi bad ki kam iarap shimet jong ka Sorkar lem bad ki Policy baroh kin long lehnohei lada ki samla ki dei kiba ngop ha u droks. U droks u pynjot ym tang ia u nongdih hynrei ia ka iing ka sem, ka imlang sahlang bad ka lawei” ula bynrap.
Haba kren halor ka DREAM Project ne ka Drug Reduction, Elimination and action Mission ba ula pyllait paidbah dang shen, u Myntri Rangbah ula ong ba ka jingmang tyngka ban pyntreikam ia kane ka Mission ka kot T. 10 klur shisnem ka ban long haduh T. 50 klur ha ka san snem.
“Ka Sorkar kan sa tei ia ki Rehabilitaion Centre bad ki Detoxification Centre bapher bapher bad ki Seng Trei monsngewbha kin sa ioh ia ka jingkyrshan song pisa ban ai jingsumar bad kner ia ki kti sha ki nongdih droks ha ka Jylla” ula ong. Ula kyntu ruh ia ki seng treimonsngewbha, ki sengniam, ki jaka pule, ki dorbar shnong ba kin buh ia ka jingiakhun pyrshah ia u droks kum ka kam kaba hakhmat eh.
Ka DREAM kan nang nang pynkhlain ia ka Meghalaya Drug Abuse Prevention Policy, 2020, ba kan poi sha ka thong ban ratdyngkhong ia ka jingdih droks hapoh ka Jylla.
Ha kane ka sngi, u Myntri Rangbah ula pyllait paidbah ruh ia ka Drug Free Meghalaya App, aiti ia ki Drugs Detection Kits sha ki Anti Narcotics Tasf Force (ANTF), pynkupburom ia ki seng trei mon sngewbha, ki riew shimet bad ka ANTF halor ka jingtrei shitom ban iakhun pyrshah ia u droks bad pyllait paid ruh ia ka jingrwai “Turn the Tide” bala rwai da ka Khaki Vibes.
Today we released the ‘Drug Free Meghalaya App’ designed by @MeghalayaGov which will educate citizens on the harmful effects of Drugs & to inform @MeghalayaPolice about any information related to shipment or smuggling of drugs. Also handed over the Drug Detection Kits to the ANTF… pic.twitter.com/tLMNReeM1O
— Conrad K Sangma (@SangmaConrad) June 26, 2023
Kiba la iadonlang ha kane ka sngi ki kynthup ia u Symbud Myntri Rangbah Bah Prestone Tynsong, DGP ka Meghalaya, Dr L R Bishnoi, Additional Chief Secretary, Home, Dr Shakeel P Ahammad, ki Heh Pulit, ki Heh Ophisar na ka Social Welfare department bad ki samla pule na ki skul bapher bapher ka Nongbah Shillong.
Pule lang ia kane: Kem ki Pulit ka Assam ia 2 ngut ki snar khaii drok, kurup heroin ba shongdor T. 18 klur
