Shillong, Nailur 24 : U Myntri Rangbah ka jylla Conrad K Sangma ha ka sngi Saitjain ula kyntu ia ka College of Community Science (CCS), Central Agriculture University (CAU), Sangsanggre,Tura bad ia ki samla pule ba kin pyntreikam ia ki jingtip ba ki ioh lum naka jingwad bniah ha kaban kyntiew ia ka ioh ka kot jong ki Nongshongshnong bad ka imlang sahlang.
U Myntri Rangbah ula buh ia kane ka jingkyntu haba iashimbynta kum u kongsan ha ka jingpynhap pyrda ia ka College Week jong ka College of Community Science, Central Agriculture University, kaba long ha Tura District Auditorium.
Attended the 19th Foundation Day of the College of Community Science under the Central Agricultural University in Tura.
Commend the College and the University for their efforts in educating our youth. Wish them the best for their future endeavours. pic.twitter.com/3daksdsVeQ
— Conrad Sangma (@SangmaConrad) September 24, 2022
Ha ba ai jingkren, u Conrad u la ai ka jingiaroh ia ki nonghikai bad ruh ia ki samla pule kiba la pynphuh ia katei ka jingrakhe ia ka sngi khraw (Foundation Day) bad pynkynmaw ruh ia ka jingiaid lynti jong ka nalor ba ka don ruh ka jingiadei kaba jan bad u (L) PA Sangma, Lamphang barim ka Lok Sabha uba la don ka bynta kaba khraw ban wanrah ia katei ka College sha Tura kaba kylla long ka jingmyntoi ym tang ia ki samla pule hynrei ia ka imlang sahlang baroh kawei.
U pynpaw ruh ia ka jingsngewnguh ia ki nonghikai kiba mynshwa bad kumjuh ki samla pule ba rim kiba la noh synniang haduh katta katta na ka bynta ban kyntiew ia katei ka college.
Shuh shuh u la ai jingmut ruh ba katei ka jaka pule hadien ba la dep ban wad bniah bad ruh shem ia ki lad kiba thymmai kadei ban pyndonkam ne pyntreikam khnang ba kan poi sha ki paidbah bad ki ruh kin myntoi lang na katei ka jingwad bniah jongki khamtam eh ban kyntiew ia ki nongtrei kam lajong bad ruh ia ki heh spah ban wan sha kawei ka rynsan ban iatrei lang.
Da kaba kdew ba katei ka College ka don ka bynta kaba khraw na ka bynta ban kyntiew ia ki shnong ki thaw khamtam ha nongkyndong, u Conrad u la pyntip ruh ba mynta ki la don haduh kumba 42,000 tylli ki Self Help Groups ha ka jylla kiba ka sorkar kala ai ruh ka jingkyrshan kaba kyrpang khamtam ia ki Group kiba don ia ki longkmie da ka thong ban kin donbynta lang ban kyntiew ia ka ioh ka kot.
Shuh shuh u ong ruh ba khnang ban pyntikna ba katei ka college kan ym kut tang ban pynmih ia ki graduate, u la ai jingmut ruh ba un ai ka jingkyrshan na ka bynta ban sdang noh da ka pilot project bad ki nongtreikam lajong ryngkat ki samla pule ha kaba sdang.
La ioh ruh ia ka jingkren na ka symbud kongsan, kaba dei ka MP, ka Agatha Sangma kaba la ong ba ka College of Home Science ba ju tip baroh shi katta kam treikam shuh tang haba iadei bad ka Sciences hynrei mynta ka la poi lut ha man la ki longiing ban wanrah ia ki jingkylla la ka long ha ka jingpynmih ia ki marbam, ki jingpynwan dur ia ki jain ki nep bad kiwei kiwei.
La ioh ruh ia ka jingkren na u Dr. Anupam Mishra, Vice-Chancellor, CAU, Imphal, Dr. Jyoti V Vastrad, Dean, CCS, CAU, Tura, DC ka Tura, Professor Namita Singh, FSN Department CCS, CAU, Tura nalor kiwei kiwei.
Ha katei ka sngi la sam ruh ia ki khusnam sha ki nongjop ha ki jingiakob bapher bapher ba pynlong da katei ka college kynthup ia kito kiba dep pyntbit ha ka jingai jinghikai halor ka suh ka thain sha Thailand.
