Shillong Naiwieng 16: U Myntri Sorkar uba khmih ia ka tnad Information and Public Relations u Bah Lahkmen Rymbui ula ong ba ka jingrakhe ia ka National Press Day kadei kaba hap banjur ia ka kamram kaba kongsan ban pathai ia ki khubor kiba shisha ha kane ka juk Digital kaba mynta.
Haba kren ha ka jingialang halor ka mat “Role of Print Media in the Digital Age,” u Bah Rymbui ha ka sngi Saitjain ula pynpaw ia ka jingroi jong ka jingeh jong ki nongshong shnong kaba ki mad ha kaban pyniapher ia ka jingshisha ha ka jingpathai khubor lyngba ki kot khubor, ki lad pathai khubor bad ha ki rynsan social media.
Ula banjur ba ka jingshaniah ka long kum u mawjam ha ka kam pathai khubor, ia kaba lah ban urlong tang lada la khmih bniah thikna ia ki jingshisha, la kynthup ia kiba bun ki mat, ka jingkiar ban wanrah ia ka jingsngewthuh bakla bad ban burom ruh ia ki kynhun kiba shah ktah.
Ula ai nuksa, ba dang shen ha ka jingialang jong ka Meghalaya Media Meet, u Bah Rymbui ula pynpaw ba u Myntri Rangbah ka jylla u Conrad K Sangma ula kren shaphang ka jingiatreilang jong ki 4 tylli ki païa hapdeng ka sorkar bad ki lad pathai khubor, ka jingpynmih ia ki khubor kiba shisha, ka jingshaniah u paitbah, ka jingpyndonkam da ka jingkitkhlieh ia ki kor teknoloji bad ka jingdon ia ka jingkitkhlieh.
U Bah Rymbui ula pynpaw ba ka sorkar ka batskhem ia ki jingkular halor kitei ki païa bad ong ba ka jingpynmih ia ki khubor kiba shisha kadei ka bynta jong ka jingshakri kaba kiar na ka jingpynheh, jingisih, jingiaphiah bad ka jingniew beiñ, haba iada ia ka jingleh kaba shimet bad ia ka burom jong ki khynnah bad kiwei kiwei ki kynhun kiba shah ktah.
Ula kdew ruh ha kaba iadei bad ka jylla Meghalaya, ban burom ia ka kolshor tynrai, ka ktien bad ia ka jingsngew jong ki shnong ki thaw kadei kaba kongsan haba pathai khubor ryngkat bad ki paitbah, ym tang na ka bynta ka jongki.
Halor ka jingpyndonkam ia ki kor teknoloji, u Myntri ula kyntu ba dei ban bhah tyngka ban thied ia ki tiar digital, data literacy, ka jingkhmih ia ki jingshisha da ka AI bad ki bynta kiba kongsan ha ki ktien tynrai ban pynthikna ba ka jingshisha kan long hakhmat eh ban ia ka jingai ia ki jingtip kiba ialam bakla.
Ula banjur ruh ba ka jingkitkhlieh kadei ban don ia ka jingiatreilang, ka jingpynmih ia kiei kiei kiba bha bad ula kyntu ia ki nongpathai khubor ban kylli ia ki jingkylli kiba eh, ban tohkit ia ki jingpynslem bad ban pynshisha la ki jingkular kila urlong ne em kumba la kular.
U Bah Rymbui ula pynkut da kaba kyntu ia ki nongpathai khubor ban pyntip ia ki paitbah bad ban pynrung ruh ha ki ia ka jingmlien ban pule hapdeng ki khynnah bad kane kan pynkhlain ia ka jinglong jingman jong ka synshar paidbah hapoh ka jylla.
