Shillong, Jymmang 25: U Myntri ka Tnad Pule Puthi Rakkam A Sangma, hynne ka sngi Palei, ula kyntu jur ia u President ka Voice of the People Party (VPP) Bah Ardent M Basaiawmoit, ba un kiar na ka jingpynbteng ia ka jingshong shah jingit ba khleh pud namar kane ka lah ban wanrah ia ka jingktah kaba jur bha.
“Ngi ialehkai ba ka ding mynta bad kan sa pynpdung ding ia baroh, kynthup ia ka VPP. Kan sa pynjot ia ka lawei jong ki khun samla jong ngi” ong u Rakkam halor ka jingiakhih u bah Ardent.
U Bah Ardent ula jam sha ka sngi kaba saw ha ka jingshong shah jingit ba khlem pud, ha jaka pynieng kali ba marjan ka Additional Secretariat ban pynbor ia ka Sorkar ba kan khot iakren ban shong bishar biang ia ka Job Reservation Policy ka Jylla.
U Myntri ula sot nuksa na ka mukotduma ha Maharashtra ha u snem 2014 ha kaba ka Iingkashari Supreme Court kala pyniap ia ka Ordinance bala pyntreikam da ka Sorkar Jylla, kaba mang tam ia ka bhah ba 50% sha kawei ka Jaidbynriew riewlum. Ka Iingkashari kala pynmih ia ka circular sha baroh ki Jylla kynthup ka Meghalaya, ba dei ban sam bhah ym palat ia ka 50%.
U Rakkam ula ban jur “Ngi don ha ka jingma namar ka Meghalaya mynta ka ioh haduh 85% ka bhah ia ki paid riewlum, ha kaba 80% la sam sha ki Khasi-Jaintia bad Garo katba 5% la ai sha kiwei ki paid riewlum. Haba ka Iingkashari Supreme Court kala pan jubab n aka Jylla, ka Sorkar Meghalaya kala ai ia ki daw ba pynksan halor ka bhah ba 85% myn ha ka 27 tarik Lber, 2021. Hynrei ka rai jong ka Supreme Court halor kane ka kam ka dang sahteng haduh mynta”.
Haba kdew ia ka mukotduma u snem 1992 ha Iingkashari Supreme Court ba long manla ka Sorkar Kerela, u Myntri ka Tnad Pule Puthi ula kdew ba ka Iingkashari kala ai rai ba kano kano ka Job Reservation Policy bad Appointment Policy kam dei ban tam ia ka 50% ka bhah.
Ula maham “Ka jingpynbteng ia kane ka drama ka lah ban lam sha ki jingjia ki bym lah ban tip, bad lada ia ka reservation policy jong ngi la pyniap noh, dei ba ngi kiba hap shim ia ka jingkitkhlieh. Kane ka dei kaba la jia teng ha ki snem bala leit noh. Lada kum kine ki jingjia ki wan jia, ki pateng jong ngi kin nym map satia ia ngi”.
