Shillong, Risaw 11: U Nongialam ka UDP bad CEM ka KHADC Bah Titosstarwell Chyne hynne ka sngi ba-ar, ula kyntu ia ka Congress ba kan pynbeit shuwa iala ka jong ka Iing ka sem bad kiar na ka jingkdew kti ia kiwei pat ki seng sain pyrthei.
“Nga kyntu ia ki Nongialam ka Congress ba kin da shong pyrkhat bha bad ban pynbeit shuwa iala ka jong ka iing ka sem bad ban kiar na ka jingkdew kti ia kiwei pat ki seng sain pyrthei” ong u Bah Titos haba iakren bad ki lad pathai khubor.
Une u Nongialam ka UDP ula kynthoh ia kane halor ka jingkam jong ki Nongialam ka Congress ba ki paidbah ka Jylla kila ngiah ia ka Sorkar Meghalaya Democratic Alliance (MDA) bad kin nym vote shuh ia ki kyrtong na ki seng sain pyrthei kiba don ha kane ka sorkar, ha ka elekshon 2023.
Haba pynpaw ba ka jingvote ne ym vote ia ka seng sain pyrthei ka shong eh ha u paidbah, u Bah Titis ula pynkynmaw ba dei ka Congress kaba la hiar sha ka Nod ha ka jingdon MLA ha ka Iingdorbar ba 60 ngut.
“Nga kwah ban ong ia ka Congress, katno ngut ki MLA phi don. Sngewbha pyrkhat bha shuwa ban kren ia kiwei ki seng sain pyrthei. Kila dei ban pynbeit shuwa iala ka iing namar kala pra phom da ka jingbym don shuh wat tang uwei u MLA naka 21 ngut ba ki jop ha u 2018” ula ong.
