Shillong, Naitung 22: Ka United Democratic Party (UDP) hynne ka sngi thohdieng, kala kyntu ia baroh ki seng riewlum ka Jylla ba kin iatylli noh kawei shuwa ban leit sha ka elekshon MLA 2023.
Haba iakren bad ki nongthoh khubor, u General Secretary ka UDP ad MLA barim ka Nongthymmai Dr Jemino Mawthoh , ula ong ba u Nongialam barim ka UDP (L) Dr Donkupar Roy ula ban jur ia ka jingdonkam ban pynkhlain tang kawei ka seng riewlum, ka ban don bor bha ha Meghalaya. Ula ong ba kane kala sdang ban wan dur mynta bad ka UDP ka kyrmen ba ki sengriewlum ba rit kin sngewthuh ia kane ka phang.
“Ngi kwah ban pdiang sngewbha ia baroh ki seng riewlum ha ka Jylla la ki dei kiba heh ne kiba rit. Ngi don ia kajuh ka jingsngew, ngi don ia kijuh ki ishu bad ki thong, balei ngim iawanlang noh ha kane ka shatri” ula ong.
U Dr Jemino ula khot ia kane haba pynpaw ba ka UDP kam kwah satia ban don kano kano ka jingiatehlok badno bad no ruh ban leit iakhun ia ka elekshon MLA 2023.
“Ha nga hi, nga sngew ba ha kane ka kynti, ngi hap ban iakhun marwei hynrei lada don ki party kiba kwah iatreilang,, ngi long kiba pdiang sngewbha” ula ong.
Halor ka Regional Democratic Alliance (RDA) bala iathaw hapdeng ka HSPDP bad ka UDP, une u Nongialam ka UDP ula ong ba kine ki artylli ki Party ki dang iatreilang hapoh ka lama jong ka RDA.
“Hynrei, lada phi peit ia kiei kiba jia ha ki Constituency, kiei kiei baroh kila kylla lut. Ngi donkam ban hap iakren bad iatai bha halor kane ka jingiatehlok” ula ong.
Haba kylli, u Dr Jemino ula ong ba ka UDP kala pyrshang la bunsien ban wanrah ia ka jingiatylli jong baroh ki seng riewlum naduh u snem 1997.
“Ngi dei kiba mih na ka APHLC bad hadien kane, kala kylla long ka HPU bad hadien pat la pynkha ia ka UDP da ka jingthmu ban wanrah ia ka jingiatylli jong baroh ki seng riewlum hapoh ka Jylla Meghalaya” ula ong.
