Nongpoh, Nailar 28 : Ka Synjuk ki Rangbah Shnong ka Ri-Bhoi District hynne ka sngi Nyngkong, kala buh ka jingkyntu hakhmat u Deputy Commissioner ka Ri-Bhoi Arpit Upadhyaya, ba un phah ia ki Doktor sha ki Shnong ki Thaw ban iarap ia ki paidbah namar ka jingnang jur ka jingiabit jong ka jingpang ‘Niang mat’ (eye flu).
Ka Synjuk hapoh ka jingialam u Chairman Bah BB Makdoh kala pyntip ia u Deputy Commissioner ba kane ka jingpang kala iabit mynta naduh ki rangbah haduh ki Khynnah ha jan man ki shnong ki thaw jong ka District.
Ula ong ba bun na ki paidbah kila hap ban pep trei bad kumjuh ruh ki Khynnah skul kila duh ia ki klas namar ka jingiabit jong kane ka jingpang.
Namar kane, ka kynhun kala kyntu ia u DC ban phah ia ka kynhun ki Doktor sha ki Shnong lane sha ki skul ban iarap ia ki riew paidbah ha kaban sumar ia kane ka jingpang.
Halor ka jingbthah jong ka Sorkar ia ki paidbah deng ia ki Iitkhmat iong, ka Synjuk kala pynpaw ia ka jingeh jong ki longiing kiba duk ban bud ia kane ka jingbthah haba kyrpad ia ka Sorkar ba kan pynbiang lem ia ki iitkhmat kumba ka pynbiang ia ki mask ha ka por ka khlam Covid-19.
Nalor kane ka kam, ka Synjuk kala iakren ruh bad u DC halor ka jingrem palat ka bai register jaka hapoh ka District.
La pyntip ba na ka liang u DC ula kular ba un sa shimkhia ban khmih ia kitei ki kam bala kdew da ka Synjuk na ka bynta ka bit ka biang u paidbah.
