Shillong, Risaw 15 : Ka Sorkar Meghalaya kala kyntu ia ki paid nongshongshnong ka shnong Lapangap, West Jaintia Hills, ban kiar shuwa na ka jingleit ot kba khnang ban tehlakam ia ka jingnang heh ka jingiakynad ha khappud ka Meghalaya-Assam.
Kane kala mih shisngi hadien ba ka kynhun na ka shnong Lapangap hapoh ka lama jong ka Joint Action Committee (JAC), kala iakynduh ia u Myntri Rangbah Conrad K Sangma, ban kyrpad ha ka ban ai jingbit ban pyniaid beit shakhmat ia ka jingleit otkba.
“Watla ka jingot kba ka dei kaba kongsan bha ia ki nongrep bad ki paidbah hangtei, hynrei ka jingshngain bad jingiada ka dei kaba kongsan eh ha ngi. Watla ngi lah ban ai bun ki briew ban pahara hynrei kum kine ki jingjia kim hap pura ha ka jingpyniaid jong ngi. Ngim kwah ia kino kino ki jingjia ba sngewsih kin jia hangtei, kaba lah ban nang pynheh ia ka jingkynad ha ka thain. Kumta, khnang ban iaid lait ia ki jingjia ba sngewsih, ngi la kyntu ia ki nongshongshong ba ngi dei ban kiar shuwa na ka jingleit ot kba ha kane ka por, ngi dei ban long kiba iai shah” ong u Conrad haba iakren bad ki nongthoh khubor ha ka sngi Balang.
U Myntri Rangbah ula ong ba kane ka jingjia ba sngewsih kala buh ha ka jingkyndit ia ki Pulit ka Jylla Meghalaya bad Assam bad kala nang pynjur iaka jingiakynad ha ka thain.
“Ka jinglong jingman ka dei kaba khlem khmih lynti ba kan iaid ha kane ka lynti. Kila don shibun ki jing iakren kiba sngewtynnad hapdeng ki kynhun bapher bapher bad ngi la khmih lynti ba ngin lah ban jam shakhmat da ka lynti ba jai jai hynrei kum kine ki jingjia kila wan jia bad kumba nga ong, kane ka dei kaei kaei kaba wat ki Pulit ka Meghalaya bad Assam ki da kyndit” ula ong.
U Conrad ula ong ba ka Sorkar ka dang pyrshang mynta ban sngewthuh ba ha kano ka rukom kane ka jingjia ba sngewsih ka jia. “Kane ka jingjia kala dep jia bad lehse kam dei ka pork aba biang ban nang kynshoit ne aiding shuh shuh” ula pynpaw.
U Myntri Rangbah ula kular ba ka Sorkar kala trei ia ki kam ha ki kyrdan bapher bapher ban pyrshang wad ia ki lad ki lynti ban pynbeit ia kane ka jingiakynad.
“Ngin kyntu ba ngi dei ban kiar shuwa bad ailad ba ka jingsuk kan wan. Ngi dang iakren bad ki kynhun bapher bapher ban peit la ngin lah ban pynbeit ia kane ka kam. Tad haduh ban da pynbeit, kan bha shibun ba ngim dei ban leh ia kino kino ki kam kiba lah ban lam sha ka jingnang jur ka jingiakynad ha katei ka thain” ong u Conrad.
