Shillong Kyllalyngkot 20: Ka sorkar Meghalaya hynne ka sngi Thohdieng kala kyntu iaka kynhun kieng atiar Hynniewtrep National Liberation Council (HNLC) ban phaidien biang iaka rai kaba kala shim kata ban ym iahsimbynta shuh ha ka jingiakren iasuk bad ka sorkar pdeng bad ka sorkar jylla.
U Myntri Kam Pohiing ka jylla u Prestone Tynsong ula ong, ka sorkar ka long kaba kloi ban iakynduhia ki nongialam kiba hakhmat eh jong ka HNLC ha ka jaka kaba biang ban pyniaid shakhmat bad ban pynthikna ba ka jingiakren iasuk kan poi sha kaba kut da ka jingsngewthuh jingmut.
U Chairman bad u C-in-C ka HNLC u Bah Bobby Marwein bad u General Secretary bad u Publicity Secretary Bah Sainkupar Nongtraw kila phah ia ka shithi sha ka Ministry of Home Affairs lyngba u Nongaibuit u AK Mishra ban pyntip ia ka rai ba kila weng noh na ka jingiakren iasuk da kaba aidaw ba ka sorkar kala pulom ha kaban shimkhia ia ki 5 tylli ki jingdawa kiba hakhmat kynthup ban map noh ia ki nongialam ka seng kiba la shah pynngat ha ki kam bymman.
“Ka kabu Ksiar ka lah ban jia shisien ne arsien hynrei kam lah ban jia man la ka por. Kumta ngakyrpad sngewrit ia ki nongialam ka HNLC ba kan pyrkhat biang bad ban pynkylla biang ia ka rai kaba kala shim bad ban pyntip sha ka sorkar” ong u Bah Prestone Tynsong haba iakren bad ki nongthoh khubor.
“Nga kwah ban kyrpad ia ki nongialam kiba hakhmat ba lada ki sheptieng ba ki lah ban shah kem, nga kyntu ia ki ba kin jied ia ka jaka, ngi long kiba kloi ban iakynduh bad ban iatai namar ngi kwah ban pynthikna ba ka jingiakren iasuk kan long kaba seisoh bad kan kut da ka jingbha” ula ong.
U Bah Prestone ula pynshai ruh ia ka daw jong ka jingkyntu jong ka sorkar ban iakren bad ki nongialam kiba hakmat jong ka HNLC bad ula ong, “Namar ba ki briew kiba la shah pynkup bor ha ka HNLC kim shym la lah ban shim ia kano kano ka rai (ha kajingiakren bad ka sorkar) ngi kyntu jur ba ia ka jingialang dei ban long bad ki nongialam kiba hakhmat eh, kiba lah ban shim ia ka rai namar ba ngi kwah ba ka jingiakren kan poi sha kaba kut bad kaba don ia ka jingmut. Kumta ki nongialam kiba hakhmat kidei ban mih shakhmat”.
Ula ong ba ka rai jong ka HNLC ban weng na ka jingiakren iasuk kala pynkyndit iaka sorkar.
Halor ka jingdawa ka HNLC ban map noh ia ki kam bymman kiba lapynngat ia ki dkhot bad ki nongialam, u Bah Prestone Tynsong ula ong ba ka jingshisha ha ka jingiakren iasuk ha ka wat kaba nyngkong, u Ksiang jong ka sorkar bad u Nongaibuit ka MHA kila dep ban kyrpad ia ka kynhun kieng atiar ba kan ai da ka jingthoh ia kathup kyrteng jong ki dkhot kiba dang sahteng ki kam bishar ha ki iingkashari ki bapher bapher, khnang ba ka sorkar kan lah ban shimkhia ia kaei kaba kadei ban leh, hynrei ka HNLC kam shym la aiti ia ka kyrteng jong ki dkhot kiba dangsahteng ki kam bishar pyrshah ia ki.
“Ngi la pan ia ki jingtip hynrei kim shym la ai satia bad ngi la iai ap bad ngi la ioh pdiang pynban ia ka shithi ba kim treh shuh ban bteng ia ka jingiakren iasuk namar kane. Ha ka jingshisha ia katei ka mat la dep ban iatai ha ka jingiakynduh kaba nyngkong bad dei kane ba ki briew kiba la shah pynkup bor ha ka HNLC kila leit phai biang sha Bangladesh ban iakren bad ki nongialam kiba hakhmat eh halor katei ka mat, ia kiei ki nongrim bad ki jingpynshai kiba la tyrwa da ka sorkar ia ki nongialam kiba hakhmat eh” ula ong.
Ka HNLC kala pynpaw ruh ba ki summon notice kiba laai da ka NIA bad ka Court jong u Judicial Magistrate First Class, Shillong katba ka jingiakren iasuk ka dang iaid shakhmat kala pynmih ia ka jingbymshaniah.
Halor kane, u Bah Tynsong ula ong, ba ka summon notice kam dei kaba la aid a ka sorkar pdeng ne sorkar jylla namar ba kane ka kam kadei beit ka jingkitkhlieh jong ka iingkashari. Watla katta ruh, ka jingkular kaba ngi ai na ka liang ka sorkar jylla bad sorkar pdeng ka long, sngewbha ban ai ia ki jingtip baroh, katno ngut ki dkhot, la kidei tang uwei, ar ne lai ngut kiba dang don hapdeng ka jingshah bishar hapoh ka iingkashari ne kumba 30 ne 20.
Kadei kane ba ha ka jingialang kaba nyngkong jong ka jingiakren iasuk la dep ban pynshai bad la dep ruh ban kyrpad da ki nongmihkhmat ka MHA bad u Ksiang jong ka sorkar jylla ia ki dkhot ka HNLC.
“Ngi lah ong ba kin ym khuslai, ai iangi baroh ki jingtip bad ngin sa pynkhreh na ka bynta ka jingiakren ha ka sien ka baar” la pynkut u Bah Tynsong.
