Tura, K’lyngkot 19 : Ki kynhun ialehkai kynthei bad shynrang jong ka kyrdan U-18 ka Ri-Bhoi District, kila ioh ban rah ia ka nam kum ki Champion jong ka 5th Meghalaya Games 2024 kaba long hynne ka sngi Thohdieng ha PA Sangma Football Stadium, Tura.
Ha ka jingiakhun kaba itynnad bha, kaba pynlong ia ki nongpeitkai ban nym khih na ki jaka shong, ka dei ka jingiakhun phainal hapdeng ki kynhun ki shynrang ka Ri-Bhoi bad ka West Jaintia Hills. Kane ka jingialehkai khlem pep ka dei kawei ka ban sah jingkynmaw ha ka madan ialehkai PA Sangma Stadium naduh ba plie ia ka.
Wat hapdeng shibun ki kabu na baroh ar liang mamla, hynrei ym shym la don ba ioh ban thep kol ha ka por bala buh, kaba lam sha ka jingiakhun extra time. Ka dei ha ka khyllip mat ba jan kut ka kylla miet jong ka extra time, u samla Riskhem Syiem ula ioh ban thep iaka kol bad pynlong ia ka Ri-Bhoi ban ioh rah ia ka takma ksiar.
Ka West Jaintia Hills watla kala iakhun katba don ka bor ka sor, kala hap ban hun noh da ka jingioh ia ka takma rupa.
Ka kynhun ialehkai ka East Khasi Hills kala ioh rah ia ka takma rnong da ka jingwan balai bad jingjop pyrshah ia ka West Garo Hills da 3-1 kol.
U Freddy Jyrwa ula ioh thep 4 kol ha ka lympung, ula ioh ia ka khusnam Top Scorer, u Kitboklang Buam ka West Jaintia Hills ula ioh rah ia ka Best Goalkeeper katba u Tirot Kyndait ka West Jaintia Hills ula ioh rah ia ka khusnam Best Player of the Tournament’.
Haba phai sha ka jingiakhun ki Kynthei, ka Ri-Bhoi kala pyni ia ka sap ialehkai kaba bit bad ioh rah ia ka takma ksiar da ka jingjop pyrshah ia ka East Khasi Hills.
Kane ka jingiakhun ruh kala kut ha ka jingiakhaid ba mar 0-0 kol bad ki ar kynhun kila hap ban jam sha ka jingshut penalty ban rai ia kiba jop.
Ha ka jingshut penalty, ka nongap kol ka Ri-Bhoi samla Nibari Maring kala lah ban iada ia artylli ki bol, kaba pynlong ia ka Ri-Bhoi ban jop da 3-2 kol.
Ka samla Nibari kala ioh ia ka khusnam Best Goalkeeper jong ka lympung ialehkai. Da ka jingioh thep haduh 15 kol ha ka lympung, ka samla Inrilaidor Khongthaw na East Khasi Hills kala ioh ia ka khusnam Top Scorer bad Player of the Tournament.
