Shillong, Iaiong 28: Ka sorkar jylla kan ym shim rai kyrkieh halor ka jingpyrkhing iaka leit ka wan ki paidbah ban tehlakam iaka jingsaphriang ka jingpang COVID hynrei ka kyntu ia baroh ki nongshongshnong ban long kiba phikir, kiba peitngor bad baroh kidei ban shim ia ka lad iada.
Ia kane la ong daka Myntri ka tnat ka koit ka khiah Dr. Ampareen Lyngdoh hadien ka jingkhlad noh uwei u briew ba 41 snem ka rta naka jingpang COVID ha West Garo Hills.
Haba kren sha ki lad pathai khubor ka kong Ampareen ka la ong ba ka tnad kan ym rai kyrkieh halor ki kyndon ban leh naka bynta ban tehlakam iaka jingsaphriang ka jingpang COVID namar baroh kila tip, kumno ban leh naka bynta ban lait na kane ka jingpang.
Ka kong Ampareen ka la ong ba ka jylla ka long kaba la pynkhreh lada don kano kano ka jingjia kaba mih naka khlam COVID hynrei kaba donkam eh ka long ba ki paidbah kidei ban shim ia ka jingkit khlieh ban iada ialade shimet bad iaka ïing ka sem.
Pule lang ia kane: Hadien arsnem, iap pang Covid u rangbah ha Tura
“Baroh ngi la ia mad iaka jingeh haka por ba wan lynshop ka khlam COVID ha ki snem bala leit noh bad dei namar kane, donkam ban bud ryntih iaki jingbthah ka tnat ka koit ka khiah bad lada ki paidbah ki sngew ba don kano kano ka dak sngew shitom, ki dei ban leit shim ia ka lad ban leit eksamin” ong ka kong Ampareen.
Ka kong Ampareen kala ong “Watla kala don ka jingkhlad noh uwei rangbah ha West Garo Hills naka jingpang COVID hynrei ka tnat kan nym pyntieng pynsmiej ia ki paidbah ka jylla hynrei ka kyntu ia baroh ban bud ryntih iaka jingbthah ka tnat ka koit ka khiah haba iadei bad ki lad jingiada bad jingsumar na kane ka jingpang.
Kala pyntip ba haduh ka jingdon kiba dang don hapdeng ka jingpang COVID hapoh Meghalaya ki long 17 ngut ba kynthup 10 ngut ha West Garo Hills, 5 ngut ha East Khasi Hills bad 2 ngut ha West Jaiñtia Hills.
Shuh shuh ka la ai jingmut ia ki paidbah, ba lada ki wanphai na kiwei ki jylla ne ki ri ba dang jur ka jingpang COVID kidei ban shim ia baroh ki lad jingiada, kum ka jingset slung ialade, ka jingdeng iaki mask bad kiwei kiwei de.
Nalor kane ka Myntri kala pyntip ba ka jingshim tika dawai COVID kadei da ka jingsngewthuh shimet bad ym lah ban pynbor iano iano ruh bad naka liang ka tnat kan sa shim ka rai hadien ka jingialang bad u Myntri rangbah ka jylla haka 1 tarik Jymmang, haduh katno ka Meghalaya ka lah ban thied Tika COVID.
Pule lang ia kane: Ngat Covid haduh 6 ngut ki briew tang ha ka shisngi ha Tura
