Shillong, Jymmang 18 : Ka Sorkar Jylla kala kyntu ia ki samla pule bad ki nongtrei na ka Jylla kiba sah shipor shabar ka Ri ba kin pynrung kyrteng noh ialade lyngba ka kor online ha ka portal ka Jylla, haba kdew ia ka jingdonkam ia ka central database ban pynlah ia ka Sorkar ba kan pynkynriah marmar bad ai jingiarap ha ki por ba don ki jingjia ba hap leh kyrkieh.
Ka jingpynbna bala pynmih da ka Tnad Pohiing (Political) ka la ban jur ia “ka jingkongsan ban pynrung kyrteng hi dalade ki samla pule bad ki nongtrei na Meghalaya kiba sah shipor shabar ka Ri bad ka Sorkar”.
Ki Heh Ophisar ki ong ba ia kane ka sienjam la shim hadien ka jingiohi ia ki jingeh kiba mih na ki jingjia kiba jia ha ki por bala leit. ‘Ka Sorkar kala shem ba ki don bun ki nongtrei bad ki samla pule na Meghalaya kiba trei shipor lane leit pule ha kylleng ki ri nongwei ha ki bynta bapher bapher” ong ka jingpynbna.
“Ia mynta, ka Sorkar kam pat don satia ia ka central database ban buh jingkhein ia kine ki nongtrei bad ki samla pule kiba sah shabar ka Ri. Namar ka jingbym don ka jingkhein, ka la long ka jingeh kaba khraw ia ka Sorkar ban ioh ia ka jingtip kaba dei haba iadei bad ka jingdon ki nongshongshnong kiba sahkut ha ki por ba mih ki jingjia ba kyrkieh kum ka thma, ka jingiaumsnam, ka jingiakhih lane kino kino ki jingiakynad ha ki ri nongwei”.
Kane ka database ba thmu ban buh ka dei kaba la leh da ka jingmut ban pynbeit ryntih ia kiei kiba hap ban leh ha ka khep ba mih kino kino ki jingjia. “Khnang ban pynthikna ia ka jingleh kloi bad ki kam kiba treikam bha ha ka por ba donkam kyrkieh, ka Sorkar ka sngew ba ka long kaba donkam ban thaw ia ka central database ia ki nongtrei bad ki samla pule kiba dei na Meghalaya kiba sah shipor shabar ka Ri” kala ong “Kane ka database kan long kum ka jingpyni kaba kongsan ha kaban pynkloi ia ka jingpynkynriah, ka jingwan ialam pat, bad ka jingwanphai suk ki nongshongshnong sha la Iing ha ki khep ba mih kino kino ki jingjia”.
Kat kum kane ka jingpynbna, “baroh ki nongtrei bad ki samla pule kiba thmu ban leit shabar ri ban trei lane pule, kumjuh ruh kitp kiba la trei lypa ne pule lypa shabar, ki lah ban ai ia ki jingtip ba bniah kum ka kyrteng, ka jingtip kumno ban ioh iakren ia ki, ka jaka sah ba pura ha Meghalaya, ki jingtip ba bniah shaphang ki Kmie Kpa ne ki nongri nongsumar, ka jaka ba ki sah ha ki ri nongwei, bad kiwei ki jingtip kibadonkam lyngba ka online portal ha http://meghalayaone.gov.in.”
Katba ka jingpynrung kyrteng ka dei da ka monsngewbha lajong, ka Sorkar ka pynpaw ba ka ai jingmut skhem ia kane. “Watla ka jingpynrung kyrteng kam dei kaba hap leh beit, la pynshlur ia ki nongtrei bad ki samla pule ba kin pynrung kyrteng ialade bad ai ia ki jingtip kiba donkam khnang ba ka Sorkar kan lah ban ai jingiarap ia ki ha ki khep ba ki donkam kyrkieh lane ba don kino kino ki jingjia” ong ka jingpynbna.
Haba pynthikna ia ka jingiada ia ki jingtip ba shimet, ka Sorkar kala bynrap “Ka Sorkar kala kular ba ia baroh ki jingtip bala ai da ki nongtrei ne ki samla pule yn sa buhrieh pyrrkhing bha bad yn ym buh ha ki rynsan ba ki paidbah ki lah ban iohi. Ia kine ki jingtip yn khmih tang ha ka por ba don ki jingjia ba hap ai jingiarap kyrkieh”.
Ka portal http://meghalayaone.gov.in kala treikam mar dor na ka bynta ka jingpynrung kyrteng.
