Shillong Lber 20: Ka Deputy Commissioner ka East Khasi Hills Kong RM Kurbah hynne ka sngi Palei, kala ban jur ia ka jingdonkam ban don ia ka Disaster Management Plans ha ki iing bad ha ki shnong ki thaw bad kala kyntu ia ki paidbah ba kin kiar ha ka ban pynkhein ia ka Building Byelaws.
Haba iakren bad ki la pathai khubor halor ka Mock Drill, ka Kong Kurbah kala ong, ia kane ka mock drill la pynlong na ka bynta ban pynthikna ia ka jingpynkhreh ia ka jingwan lynshop ki bor ka mariang khamtam u jumai da kaba buh jingmut ba ka Meghalaya ka dei kaba hap ha ka Zone 5, kaba dei ka jaka kaba u jumai u lah ban khie jur bha.
“Kumta ngi hap ban long kiba la pynkhreh. Ngi dap da ka jingkmen mynta ka sngi ba katei ka jingleh baroh kala long kaba iaid beit iaid ryntih bha” kala ong.
Ka Kong Kurbah, kaba long ruh ka Chairperson jong ka District Disaster Management Authority (DDMA), kala ban jur ia ka jingdonkam ban pynsngewthuh shuh shuh ha ki shnong ki thaw ha ki thain nongkyndong, ki ophis bad ki skul kumno ban leh haba khynniuh u jumai.
Kala ong, ba man la ki longiing ki dei ban don iaka Disaster Management Plan. “Lada jia kumno kumno ruh, ki dei ban ioh jinghikai kiei ki sienjam kiba nyngkong eh kaba kidei ban shim haba wan lynshop ka bor mariang. Phi hap ban iada shwa ialade (da kaba riehtngen hapoh jong ka miej). Dei na kata ka daw ba ngi donkam ia ka jingai jinghikai namar kine kiei kiei ki dei kiba ym lah ban shu tip beit kumto”.
Ka DC kala ong, ba ka longiing kad ei ban ioh jinghikai nyngkong eh ban don ia ka jingshngain ryngkat bad ka pynthikna ia ka bam, ka um, ki dawai dashin bad ki jain ki nep kiba lah ban dap haduh 78 kynta tad haduh ba ki bor district kila pynkhreh ban sam ia ki jingiarap.
Kala kyntu ia baroh ki Dorbar Shnong ba kin shimkhia ban pynmih hi iala ki jong ki Disaster Management Plan.
“Ngi donkam ban ithuh lypa ia ka jaka ban shong rieh tngen, kane kadei kaba kongsan kaba man ki shnong ki dei ban don. Kidei ruh ban don lypa ia la ka jong ka Disaster Management Plan” kala ong.
Ha kaba iadei bad ka jingshna ia ki jingtei kiba heh, ka Kong Kurbah kala ong, ba ka long kaba donkam ban pynsngewthuh ia ki paidbah, kiba dang shna ia ki iing ba kin don ia ka plan kaba biang bad ba kin kiar na ka jingpynkhein ia ka building byelaws.
“Ngi im ha ka Zone 5, ka bym long shngain ia ki jingtei building kiba heh. Ka don ka building byelaws bad ki paidbah kim dei ban pynkhein ia ki bad kidei ban ioh ia ka plan jong ka jingtei ia ki building kaba la pynskhem da ki Engineer namar ki dei kiba la tbit bha ha kane ka bynta. Ki paidbah ki lah ban sngew ba kane kadei ka jingwan tuklar ia ka kam shimet ka jongki, hynrei phi dei ban pyrkhat ba phi buh ha ka jingma iala ka longiing bad ia ki marjan marpa lada jia ba ka building ka khyllem” kala ong bad ka bynrap “Ka donkam shisha ban pynkylla ia ka rukom pyrkhat, kam dei ba phi leh na ka bynta kiwei pat ki briew, kadei kaba phi leh nyngkongeh na ka bynta ialade namar ka jingtei ka jong phi kam long satia kaba shngain”.
Hashwa kane, la pynlong ia ka Mock Drill ha kaba la iadonlang ki heh jongka NDMA bad ia kane ka mock drill la pynshong nongrim ba ka don ka jingkhynniuh u jumai uba khlain haduh 8.3 ha ka Ritcher Scale.
Ka Kong Kurbah kala ong, ba ki bor pyniaid district kila dep ban ithuh ia ki 8 tylli ki jaka.
“Kine ki kynthup ia ka jingtwa khyndew, ka jingpluh ding ha kawei ka skul bad ha kawei ka Petrol Pump bad ngi la don ruh ia kiwei kiwei ki jingjia ha ka Iew Polo, ia kiba kum kitei ngi la leh khnang ban ioh ia ki jingtip haduh katno ngi lah long kiba la pynkhreh” kala ong.
“Kaei kaba ngi lah sngewthuh shai mynta ka sngi, kadei ka jingphah ia ki jingpyntip mar kylliang naduh na ka jaka kaba la sdang kiba la don ka jingjia sha ki jaka treikam. Ngi la shim ba kam don ka lad ban ai ia ki jingpyntip lait noh thik tang da kaba pyndonkam ia ka Wireless kaba la iaid lyngba ka MPRO bad lyngba kiwei pat ki lad kiba ngi la buh lypa.
Mynta ka sngi, ngi lah pyndonkam ia kawei ka lain jong ka MPRO ha kaba ngi la leh ia katei ka Mock Drill bad ngi lah ioh pdiang ia baroh ki jingpyntip ha katei ka kamra treikam bad hadien kane ngi la pynwandur ia ka plan bad ia ki jingdonkam bad kumjuh ban phah ia ki jingtip sha u Incident Commander, ha kaba ma u pat u phah kylla ia ka kynhun ki kali kit nongpang bad ki kali pynlip ding” kala bynrap.
