Kyntu ka PDAM ia ki paidbah ban phikir bha bala khleh lang ia ka petrol bad ethanol

Shillong, Jylliew 26: Ka Petroleum Dealers Association, Meghalaya (PDAM) ha ka sngi Balang, kala kyntu ia ki paidbah ba kin long kiba phikir bha namar bka don ka jingkhleh ia ka Ethanol ha ka petrol.

Haba iakren bad ki nongpathai khubor, u President ka PDAM Bah Kenedy C Khyriem ula ong, naduh u Rymphang 2022, ka sorkar India, lyngba ka Petroleum Ministry kala sdang pyntreikam ia ka jingkhleng lang 10% ka Ethanol ha ka Petrol hapoh ka ri. Mynta ka sorkar kala sdang ban khleh haduh 20% ka Ethanol ha ka Petrol.

Namar ba ka Ethanol ka dei kaba kjit ia ka haw haw bad kloi ban shim ia ka um kumta ka lah ban ktah kylla ia ki kali.

Ula ong ba ki Dealers Association ha ka ri baroh kawei, kila pyrshah jur ia kane ka jingthmu jong ka Sorkar namar wat lada don tang khyndiat ka um ha ki tanki kali ne hapoh jong ka tanking jong ngi kiba don shapoh khyndew, kane kan pynmih ia ka jingeh. Hynrei ka sorkar kala pynmih ia ka Petrol bad die ia kane ka petrol ba khlehlang bad ka Ethanol.

Ka jingpynsngewthuh paidbah kala iaid ha baroh kawei ka ri shaphang ka jingkhleh lang ia ka Ethanol ha ka Petrol khnang ba ki paidbah kin tip ia ki jingeh ki ban mih bad ba kin nang ban sumar ia ki tanki ha ki kali jong ki, kum ka nuksa ba kin ym pynieng kula rha ki kali, scooty, motor bike ha ki jaka bym don jingker ne jingkah.

Khamtam ha ka por lyiur ka long kaba kongsan ia ki nongthied ba kin tap bha ia ki kali bad ki thuk thuk khamtam eh ia ki thuk thuk bad ban pynthikna ban tap bha ia ki jingsop jongka tanki.

U Bah Khyriem ula ong hashwa ban sdang ia ka jingkhleh lang ia ka Ethanol bad ka Petrol, ki trai jongki Petrol Pump kila pynkhuid ia ki tanki kiba don shapoh khyndew ban pynthikna ba ym dei ban don um. Nalor kane, ngi khmih man la ka sngi ia ki tanki ban ym don um.

Nalor katei, ka Meghalaya ka dei kaba mad ia ka jingjur slap bha kumta ka don ka jingma ba ka um ka lah ban rung ha ki tanki khamtam eh ha ki tanki jongki thuk thuk.