Kyntu ka NPP ia ki seng sain pyrthei ban iashimbynta ha ka All Party Committee halor ka lynti rel

Shillong, Jymmang 13 : U Nongaiktien ka National People’s Party (NPP) Bah Himalaya M Shangpliang ha ka sngi Ba-ar, ula kyntu ia baroh ki seng sain pyrthei ban iashimbynta ha ka jingialang ka All Party Committee bad ban ai ia ki jingai jingmut bad ki jingpynsngew halor ka jingtyrwa ban pyntreikam ia ka project lynti rel ha Jylla.

“Ngi kyntu ia baroh ki seng sain pyrthei ban iashimbynta ha ka jingialang ka All Party Committee halor ka lynti rel. Ka Sorkar Jylla kala ai ia ka rynsan ha baroh baroh ki nongialam sain pyrthei ki lah ban iawanlang ban iakren bad iatai halor ki mat kiba iadei bad ka roi ka par ka ioh ka kot jong ka Jylla lyngba ka lynti rel” ong u Bah Shangpliang haba iakren bad ki nongthoh khubor.

“Lada ka Congress bad ka VPP ki sngew ba ki don ka jingkitkhlieh na ka bynta ka jingkiew bad ka roi ka par ka Jylla, ki ruh ki dei ban iashimbynta ha ka jingialang ka All Party Meeting da kaba ai ia ki jingai jingmut kiba shongdor. Kane kan iarap ia ka Sorkar Jylla ba kan wanrah ia ka lynti ban pynbeit, ka ban wanrah ia ka roi ka par jong ka Jylla bad ha kajuh ka por kan wanrah ia ki lad jingiada na ka jingrung kyrthep ki briew ba nabar” ula ong.

Haba ban jur ia ka jingdonkam ban sngewthuh ia ka jingkongsan ka jingpyniasoh lynti rel, ula ong “Lad aka Jylla kum ka Mizoram ka pdiang ia ka jingwan ka lynti rel hadien ba ka sngewthuh ia ka jinglong kongsan, ngi sheptieng ba ka por ka lah ban wan ba ka Jylla kan dei tang ma ka na ki Jylla ha ka thain Shatei Lam Mihngi ka bym pat pyniasoh lynti rel”.

U Bah Himalaya ula iakren ruh halor ka jingdonkam ban iakren ia ka jingsngew sheptieng ba ka lynti rel kan nang wanrah ia ka jingrung kyrthep ki briew ba nabar shapoh ka Jylla.

“Ka NPP kam kwah ia ka jingwan rung kyrthep ki briew ba nabar. Kumta, ngi kwah ban iasyllok bad baroh ki seng sain pyrthei naba ngi donkam ia ka lynti rel hynrei ngim donkam ia ka jingrung ki briew ba nabar. Ngi donkam ia ka buit treikam ka ban iarap ban pynbiang tarajur hapdeng ka roi ka par bad ka jingiada ia ka jingrung ki briew ba nabar” ula ong.

Nalor kane, une u Nongialam ka NPP ula pyntip ba ka party kala ai jingmut ruh ia ka Sorkar Jylla ba kan pynlong ia ka jingiasyllok bad baroh ki kynhun kynthup ki Khlieh Nongsynshar bad ki kynhun Sengbhalang halor kane ka kam.

“Hadien ka jingiasyllok bad baroh ki kynhun, ka Sorkar kan sa shim pat ia ka rai la ka Meghalaya ka dei ne em ban pyntreikam ia ka project lynti rel” ula ong haba bynrap ba halor ka rai bala shim na kine ki jingialang, ka Sorkar Jylla kan pynbor ia ka Sorkar Pdeng ba kan pyntreikam noh mardor ia ka Inner Line Permit (ILP) bad kiwei pat ki ain ki ban pyrrkhing ia ka jingrung kyrthep ki briew ba nabar shapoh ka Jylla.