Shillong, Jymmang 20 : Ka North Eastern Hill University Teachers Association (NEHUTA) kala kyntu ia ka Acting Vice Chancellor Prof SM Sungoh ba kan pyniaid beit shakhmat ia ka jingialang jong ka Academic Council (AC) 113, kaba la buh ban long ha ka 21 tarik Jymmang.
Kat kum ka jingong ka NEHUTA, ka Acting VC ka dei kaba la iohbor pura ban trei kum ka Vice Chancellor kat kum ka NEHU Statute 2(A)(5)(i) bad ki jingpynbna jong ka Ministry of Education ba pynmih na ka por sha ka por haba ym don u VC ba pura hapoh ka campus.
Ka NEHUTA kala ong ba u VC ula pynjlan ia ka shuti ba khlem da ioh bor bad um pat ju wan kiew satia hapoh ka Ophis ha NEHU Shillong ban wan trei bad pyndep ia ki kamram kat kum ka Statutes 2(A)(2).
“Ka long kaba samrkhie bad lehrain ba u Prof PS Shukla, uba dei u nongpynkhein ba hakhlieh duh ia ka NEHU Act, Statutes bad Ordinance, ki kyndon ka UGS 2018, UGC Model Cadre Recruitment Rules ia ki Non Teaching Staff, CCS Rules bad kiwei kiwei, kaba ka NEHU ka ju tip, ula buh jingkylli ia ka jingshong ain ba ka Prof Sungoh kan pynlong ia ka jingialang jong ka Academic Council” ong ka kyrwoh bala pynmih da u President Prof. Lakhon Kma bad General Secretary Dr Marbhador M Khymdeit.
Kat kum ka jingong jong ki, la wanrah haba dei eh ia ka Prof Sungoh ba kan trei ia ka kam kum ka VC kat kum ka NEHU Act bad Statutes bad ka NEHUTA ka ieng ha lyndet jong ka ban kyrshan ia k aba kan lah ban pyndep ia ki kamram khlem ka jingsheptieng ne jingjied briew.
“U Prof Shukla u da thrang hir hir ban pynthut bad pynjot ia ka NEHU kaba ma ngi, ngin iakhuh pyrshah katba lah. Ka NEHU ka dei kaba la pynkhreh nadong hadong ban pynbeit ia ki jingsngewkhia jong ki College, ki samla pule bad ki Kmie Kpa khlem u Prof Shukla” kila ong.
“Ha ka jingshisha, ka jingbym wan trei jong u ha kine ki 6 bnai ha NEHU, Shillong kala long ka jingkyrkhu ba na lyndet ha kaba baroh ki jingpyntrei ia ki jingtei, ki file bad kiwei kiwei, kiba ula pynsahkut la 3 snem shiteng, kila sdang iaid bad la pyndep” kila bynrap.
Ka NEHUTA ka ong ba u Prof Shukla u dang dei ban bteng ban lehkmen na ka jingshim shuti khlem jingbit bad ka jingioh beit ia ka tulop ha kano kano ka jaka ba u don la ka dei ha Guwahati, Delhi, Gonda, Uttarakhand, Lucknow, ha duriaw ne ha ka haw, bad ailad ban pyniaid ia ka NEHU da ki briew kiba don ka jingkitkhlieh ia ka kat kum ka NEHU act bad statutes.
Kala kren shai shai, ka NEHUTA kam pat ju pdiang ia ka jingthung be-an ia ki Pro Vice Chancellor haba pynshong nongrim na ki jngpynbna bala pynmih da u Assistant Registrar, Planning ba 13 tarik Naiwieng 2024 bad hadien da u Omkar Singh ba 14 tarik Naiwieng 2024 bad ka daw hi ka long namar ba u VC, u bym shym la don ha HQ ka NEHU, Shillong, u khlem iaid kat kum ki kyndon bala buh hapoh ka NEHU Statutes 3 halor ka jingthung ia ki Pro VC.
Ka NEHUTA ka kyrmen ba ka jingialang jong ka Academic Council ka ban long ha ka 21 tarik Jymang kan long kaba seisoh bha ha ka jingiakren bad jingiathir ia ki mat bapher bapher.
 kala kyntu ia ka Acting Vice Chancellor Prof SM Sungoh ba kan pyniaid beit shakhmat ia ka jingialang jong ka Academic Council (AC) 113, kaba la buh ban long ha ka 21 tarik Jymmang.){kind=link}