Shillong, Jylliew 06: Ka Khun Hynniewtrep National Awakening Movement (KHNAM) kala kyntu ban tuklar ka Meghalaya Human Rights Commission (MHRC) halor ki jingkynnoh pynkhein hok longbriew manbriew bad jingpyndonkam palat pud ia ka bor da ki shipai Border Security Force (BSF) hapoh ka Jylla.
Ha ka shithi ujor bala phah sha u Chairperson ka MHRC, u Working President ka KHNAM Bah Thomas Passah ula ong “Ngi kyrpad ia ka Commission ba kan tuklar ia ka jingpynkhein hok longbriew bad pyndonkam palat pud ia ka bor da ki BSF”.
U Bah Passah ula ong ba man ka por la mih khubor ba ki shipai BSF kila pynmynsaw ia ki nongshongshnong ba lui lui ka Meghalaya ha ka jaka ban iada ia ki jaka khappud bad ka Bangladesh.
Haba kdew ia ki katto katne ki jingjia bala jia, ula ong ba u nongkit masi Bah Roning Nongkynrih ba 32 snem, ula shah siat iap ha ki shipai BSF ha Mawshun, East Khasi Hills District ha ka por 11 baje mynmiet.
Kane ka jingjia kala jia ha shnong Mawshun kaba don marjan ka Pomshutia, kaba jngai kumba 17 km eiei na khappud ka India-Bangladesh katba ki shipai BSF ka 4th Battalion ki don ha Pyrdiwah.
Ula pyntip ba uwei u Ophisar ka Tnad Animal Husbandry & Veterinary ka Muktapur Veterinary Dispensary ka Sorkar Jylla (Dr Seiboklang Buam) ula shah shoh ha ki shipai BSF ha Lakroh Shiv Mandir, Hawai Tilla, West Jaintia Hills. Ula shah bat ha ki shipai BSF katba u dang leit khwai dohkha bad haba ula ring video ia kane ka jingjia da ka mobile phone, ki BSF kila knieh ia ka phone bad phah law lyngkhuit ia u bad byrngem byrsit laiphew jait ia u.
Nalor kane, u Bah Passah ula kdew ba dang shen ki shipai BSF hapdeng ka jingbuaid kyiad, kila shoh ia laingut ki samla ka shnong Lyngkhat. Kat kum ka jingiathuh kine ki lanot, ki shipai BSF kila maham ia kine ki briew ba kin yn pyntip iano iano ruh shaphang kane ka jingjia bad pyrshang ruh ban pyntieng pynsmiej da kaba pynap pistol ia ki.
“Kine ki dei ki katto katne ki jingjia kila la mih khubor kiba jia dang shen khlem da kdew ia kiba bun ki jingpynkhein hok longbriew manbriew da ki shipai BSF ha baroh kine ki snem bala leit noh” ula ong ha ka ujor.
 kala kyntu ban tuklar ka Meghalaya Human Rights Commission (MHRC) halor ki jingkynnoh pynkhein hok longbriew manbriew bad jingpyndonkam palat pud ia ka bor da ki shipai Border Security Force (BSF) hapoh ka Jylla.){kind=link}