Shillong, Nailur 06: Ka Jaintia National Council (JNC) hynne ka sngi Balang, kala ban jur ba ka long kaba donkam iaka Regional Committee jong ka Assam bad Meghalaya ban pynlong iaka Survey katkum ka Histori jong ki jaka ba iakajia.
“Ka Council ka sngew ba ki Regional Committee jong baroh 2 tylli ki jylla kidei ban Survey ne ban jurip iaki jaka iakajia katkum ka Histori daka jingiarap na ki stad lane ki Experts na ki tnat treikam bapher bapher kiba peit iaki jaka jong riewlum kiba don ha kine ki jaka” la ong u president ka JNC u samla Sambormi Lyngdoh haka dorkhas bala aiti sha u Symbud Myntri Rangbah ka jylla bah Sniawbhalang Dhar u ba dei ruh u Chairman ka Regional Committee jong ka West Jaintia Hills.
U samla Sambormi ula ong ba ka jylla Meghalaya kala mih naka Assam kum ka Autonomous State ha u snem 1972 bad kane ka jingphiah jylla kadei katkum ka Assam Reorganization (Meghalaya) Act of 1969.
Hynrei ka sorkar Meghalaya ka kyntait ia kane ka Act namar ki jaka ba mynta kata ka Jaintia Hills, Ri-Bhoi and West Khasi Hills districts kila shah Transfer noh shaka Karbi Anglong, Kamrup (metro) bad Kamrup districts jong ka Assam.
U samla Sambormi ula ong baka Meghalaya kala iakhun ia kane hadien bala ioh jylla ba pura daka ba ong ba kine ki hap haka jingkhmih daki Syiem rilum. Ka Assam kala kam ba sorkar Meghalaya kam lah ban pynbiang iaki kot ki sla kum ki sakhi sabut bad hadien ka jingiakam mar kylliang, ia kine ki jaka iakajia la khien kyllum haduh 12 tylli ki katkum ka jingkam ka Meghalaya ha u snem 2011.
Ula ong ba ki Regional Committees jong baroh 2 tylli ki jylla ki dang don hapdeng ka jingiakren ban pynbeit noh ia u pud u sam.
“Hynrei ka JNC ka kwah ban pyntip ba ki Regional Committee jong baroh 2 tylli ki jylla kim don ki stad lane ki Experts na ki tnat treikam bapher bapher ban khmih halor ka Histori jong kine ki jaka iakajia khamtam haba iadei bad ka tynrai ka synshar khaddar ki jaidbynriew riewlum” ula ong.
Ula pyntip ruh ba ki don ki Elaka bad ki shnong ha Jaintia Hills kiba la shah pynhap haka jingsynshar hapoh ka sorkar Assam.
“Iaka Nongphyllut Elaka la khlieh da ki Dalloi naduh ki por mynshwa kiba hap haka jingshah synshar haki Syiem jong ka Jaintia Hills ia kiba la tip kum Syiem Sutnga hynrei mynta kine ki Elaka kila shah pynhap haka jingsynshar hapoh ka sorkar Assam khlem da bishar bniah iaki Histori jong ka Nongphyllut Elaka” ula ong.
 hynne ka sngi Balang, kala ban jur ba ka long kaba donkam iaka Regional Committee jong ka Assam bad Meghalaya ban pynlong iaka Survey katkum ka Histori jong ki jaka ba iakajia.){kind=link}