Shillong, Nailur 29 : Ka Hynniewtrep National Liberation Council (HNLC) ha ka sngi U Blei kala kyntu ia baroh ki paid Hindu ha Meghalaya ba kin pyrshah ia ka jingwan rung ka “Yatra ialap khang bam doh masi” hapoh ka Jylla.
“Ka dei ka kamram jong baroh ki paid Hindu ha Meghalaya ban pyrshah ia ka ‘Yatra Masi” ba kan wan rung ha ka jaka jong ngi da ka jingthmu ban pynlong ia ka rally ne ban ialap ia kaei kaba long pyrshah ia ki trai shnong. Ka HNLC bad ki paid ka Jaidbynriew jong ngi kin nym lah pdiang ia ka jingwan tuklar ia ka rukom bam jong ngi” ong u General Secretary cum-Publicity Secretary ka HNLC Bah Sainkupar Nongtraw ha ka kyrwoh.
Ula maham ruh “Lada kane ka kynhun iada masi ki nud ban tynjuh ia ki briew jong kane ka thain jong ngi, ka HNLC kan nym shah satia ia ki Hindu ba kin rakhe ia ka puja tad haduh da kila pynsangeh noh ia ka jingthmu ban pynkohnguh ia ka jaidbynriew jong ngi ba ki mrad ki kham kordor ban ia ki briew”.
“Kino kino ki kynhun niam kiba kham shimkhia ia ki mrad ban ia ki briew, ki dei ialade ki mrad” ong u Bah Sainkupar.
Une u Nongialam ka HNLC ula kdew ruh ia kaei kaba jia hadien ka jingpynbna jong kane ka kynhun ialap khang bam doh masi ha kylleng ka Jylla Meghalaya. “Ha kiwei ki Jylla, ngi lah ban iohi tang ia ka jingpynher ia ka lama ba 21 phut, hynrei hangne ha Meghalaya, phi ai ka kabu ia ngi ban pynher ia ka lama ba 21,000 phut”.
View this post on Instagram
U Bah Sainkupar ula ong ruh ba ki jingmad kane ka kynhun ia ki jingpyrshah ban pynlong ia ka rally ha ka thain Shatei Lam Mihngi ka pyni ia ka jingkhuslai hapoh ki jaidbynriew bad bynrap “Ka HNLC ka kyntu ia ki ri kum ka America, China, Pakistan bad kiwei ba kin tuklar lem ha India hashuwa ba kan kylla long kynsan kynsan ka Ri kaba synshar da ki Nongialap niam ha ka kyrteng u Blei”.
Ula ong ruh ba kane ka rally ba thmu pynlong da ka kynhun iada masi kala pynsngewkhia bha khamtam haba iohi ia ka jingnang jur ki jingjia jong ki jingshah pyniap ki briew na ka jingkhaii bad shoh doh.
Haba sot ia ka khubor ka Reuters, u Bah Sainkupar ula ong ba ki don haduh 63 tylli ki jingthombor kiba la buh jingthoh hapdeng u 2010 bad pdeng snem u 2017, kaba lam sha ka jingiap haduh 28 ngut ki briew bad 124 ngut kiba mynsaw. Kum kine kijingjia kila nang kiew hadien ka jingshimti u Myntri Rangbah Duh Narendra Modi ia ka shuki ha u 2014.
