Shillong, Nailur 29 : Ka Ministry of Tourism ha ka sngi Thohdieng, kala pynbna ia ka shnong Umden bad Mawphlang ha Meghalaya, kum ki nongjop jong ka Best Tourism Village Competition 2024.
Ka MoT kala pynbna ia kane ha ka sngi rakhe ia ka World Tourism Day. Kine ki artylli ki shnong ka Jylla kila long ki nongjop ha ka thup ‘Craft and Heritage’.
Ka Umden kaba don ha Ri-Bhoi, kala ioh ia ka khusnam halor ka kam thain jain bad pynmih ksai rynsia katba ka Mawphlang kala ioh khuslai halor ka jingiada bad sumar ia ka law kyntang.
Ki Nongmihkhmat na kine ki artylli ki Shnong kila iadonlang ha kane ka jingrakhe ban pdiang ia kane ka khusnam.
Ban kyntiew ia ki kam jngohkai sha ki shnong ka ri India, ka MoT kala wanrah ia ka Best Tourism Village Competition naduh u snem 2023.
Ka jingphaikhmat ka long ban ithuh bad ai jingithuh ia ki Shnong kiba tyngkai bad kyntiew ia ka kolshor bad ki jingdon jingem ka mariang da ka bor shnong.
Ka jingiakop ba nyngkong jong ka Best Tourism Village Competition ha u 2023, kala iohi ia ka jingaplai na ki 795 tylli ki Shnong. Ha ka jingiakop kaba 2, haduh 991 tylli ki shnong kila aplai na ki 30 tylli ki Jylla bad UT ha kaba 36 tylli kila ioh ia ka jingithuh ha ki 8 tylli ki thup.
