Shillong, Nohprah 23 : Ka Hynñiewtrep Integrated Territorial Organization (HITO) ha ka sngi Nyngkong, kala kyrpad ia u Chief Secretary ka Jylla Bah DP Wahlang ba un tuklar lem ban khanglad ia ka jingbyrngem pakhang ia ki surok sha Meghalaya da ka seng Hindu.
Ha ka shithi sha u Bah Wahlang, u President ka HITO Donbok Dhar ula ong “ Katto katne ki shitniam ha Assam, kaba lam khmat da ka Kutumba Suraksha Parishad, kila byrngem ban pynlong ia ka jingpakhang ia ki surok ha ki National Highway ba pyniadoh ia ka Meghalaya bad Assam. Kane ka jingbyrngem ka dei halor ka kam krem Mawjymbuin”.
“Ka long kaba kongsan ban ban jur ba ka kam kren Mawjymbuin ka dei kaba hap ban pynbeit hapoh ki kyndon treikam jong ka Dorbar Shnong, ka Dorbar kaba shim ia ka bynta kaba kongsan bha ha ka jingpyniaid ia ki shnong ki thaw bad pynbeit ia ki jingiakajia hapdeng ki paid Hynniewtrep. Kat kum ka dustur jong ngi, ka Dorbar Shnong ka don ia ka bor kaba halor eh halor kine ki kam bad ka dei ka Dorbr Shnong kaba lamkhmat ha ka jingshim rai” ula ong.
Ula ong ruh, ki kyndon bala pruid dak ha ka Instument of Accession (IOA) jong ki Khasi States, kala pynthikna shai bha ia ka hok jong ki paid Hynniewtrep halor ka khyndew ka shyiap bala ai pateng da ki longshuwa man shwa.
