Kyntu ka HITO ia u Chairman ka NEDA ban tynruh pyntreikam ia ka ILP ha baroh ka NE

Shillong, Nohprah 29 : Ka Hynniewtrep Integrated Territorial Organisation (HITO) kala kyntu ia u Chairman ka North East Democratic Alliance (NEDA) bad Myntri Rangbah ka Assam Himanta Biswa Sarma ba un dawa ia ka Sorkar Pdeng ba kan pyntreikam lang noh ia ka Inner Line Permit (ILP) ha baroh ki Kylla ka thain Shatei Lam Mihngi.

“Ngi kyrpad ia phi da kaba burom, ha ka kyrdan jong phi kum u Chairman ka NEDA, bap him ialam nakhmat ha kaban dawa pyntreikam ia ka ILP hapoh ka Bengal Eastern Frontier Regulation, 1873 ha baroh ki Jylla ka thain Shatei Lam Mihngi” ong u President ka HITO Donbok Dkhar ha ka dorkhas bala phah sha u Sarma ha ka sngi Nyngkong.

Haba pynpaw ba ia mynta, ka ILP ka dang treikam tang ha ki san tylli ki Jylla, kata ka Arunachal Pradesh, Nagaland, Mizoram, Manipur bad Sikkim (ha ka dur jong ka Protected Area Permit), u Bah Dkhar ula ong “Haba khmih ia ka jinglong jingman ba mynta, kala long kaba donkam ban pyntreikam lang noh ia ka ILP ha Meghalaya bad Assam ruh kumjuh khnang ban iada ia ki trai ri trai muluk, ka khyndew ka shyiap jong ki, ka jinglong ba kyrpang bad ka kolshor ba hiar pateng. Haba ngi tip ba ka ILP kam dei ka lynti kaba pura ban khang lad ia ka jingwan rung kyrthep ki mynder, kan long pat kum ka lynti kaba kongsan ban pyrrkhing, peitngor bad tehlakam ia ka iaid ka ieng ki mynder ri hapoh ka thain NE”.

Ka HITO kala pynpaw ia ka jingsngewkhia halor ka jingkynthoh ba dang shen da u Nongialam ka Sorkar ba shipor ka Bangladesh Muhammad Yunus, uba la kam ba ka Bangladesh ka dei tang ma ka, ka nongri nongsumar ia ka duriaw na ka bynta ki hynniew tylli ki Jylla ka thain Shatei Lam Mihngi haba iai kdew ia ka Silliguri Corridor (ka ryndang syiar).

Haba pynpaw ia ki jingbym skhem ka synshar khadar ha Bangladesh bad ka jingiai iohkem ia ki nong Bangladesh ba rung beain na ki jylla ka thain Shatei Lam Mihngi, kane ka Seng kala maham ba kane ka jinglong jingman ka pynmih ia ka jingsngewkhia kaba jur halor ka jingsngain, ka jingdon ki paid bynriew bad kiwei kiwei ha ka thain.