Shillong, Nohprah 05 : Ka Nongialam ka NPP bad Myntri Sorkar Kong Ampareen Lyngdoh ha ka sngi Palei, kala kyntu ia ka seng Hynniewtrep National Liberation Council (HNLC) ba kan wan rung noh sha ka jylli sain pyrthei bad pynsngew iala ki jong ki jingsngew ha ka jaka ban shu hukum na khlaw.
Kala kynthoh ia kane halor ka jingkynnoh ba dang shen jong ka HNLC ba ka NPP kala kylla long ka atiar ia ki Garo ban pyniaid ia ka jylla haba buh hakhmat ia ki lai tylli ki mat jingdawa ba kynthup ia ka rukom treikam ban bujli ia ki Myntri Rangbah ka Jylla khnang ban pynthikna ia ka jingioh long nongialam ba mar kumjuh na baroh ki jaidbynriew ha Jylla.
“Ngan ym sngap satia ia katto katne ki hukum donbor kiba wan na khlaw. Em, phi wan shakhmat bad iakren bad ngi” ong ka Kong Ampareen haba iakren bad ki lad pathai khubor.
“Sngewbha iakhun ia ka elekshon. Wan ha ka kyrdan kaba phi lah ban pynsngew iala ki jong ki jingsngew. Nga mut, kaei kane ka jinghukum? Ngam sngewthuh kaei kaba ki mut. Ngam pat iohi dalade ia ka jingkren jong ki hynrei phim lah ban iai long ka kynhun ba narieh narieh na ka por sha ka por” kala ong.
Ka Myntri kala bynrap “Wan sha madan, ym don ba khang ia phi ban iakhun ia kano kano ka elekshon lane phi don ka jingiasngewthuh jingmut bad kiwei ki seng sain pyrthei. Kaei kata ka seng sain pyrthei kaba phi kyrshan? Pyntip sha ngi. Lada long kaba lah ban iathuh beit beit sha ki paidbah ba ka kynhun x,y.z ka kwah ban iasoh bad ka kynhun x,y,z”.
Haba pynpaw ba ka jingdon MLA ka NPP kala kiew sha ka 32 ngut ha ka Iingdorbar ba 60 ngut, ka kong Ampareen kala ong “…phi donkam ia u nombor ha ka Iingdorbar Thaw Ain, bad mynta ngi don ia u nombor uba biang. Ki paidbah kila klet ba ngi don uwei u MLA na West, MLA na Ri-Bhoi. Ka NPP kala don 32 ngut haduh ngim dei shuh ki Khasi?. Nga mut, kaei kane ka kam kai”.
Haba kyrpad ban kiar na ka jingmut jingpyrkhat ba sngew iapher Jaidbynriew, ka Kong Ampareen kala ong “Wat pynrung ia ka jingmut jingpyrkhat iapher Jaidbynriew. Ngi hap ban iatylli ban iakhun pyrshah ia ki nongthombor. Wat iuhroit ia ngi bad nang pyniapait iapra ia ngi. Nga sngew skhem, ka NPP ka dei ka party ba treikam ha baroh kawei ka Jylla Meghalaya, kaba kdup ia baroh ki niam. Ngim don jingshah liang iano iano ruh. Ngi shakri ia ki paidbah ka Jylla. Ngi burom ia baroh ki niam, baroh ki jaidbynriew”.
 ba kan wan rung noh sha ka jylli sain pyrthei bad pynsngew iala ki jong ki jingsngew ha ka jaka ban shu hukum na khlaw.){kind=link}