Kohima, Nohprah 02 :Ka Nagaland Pradesh Congress Committee (NPCC) ha ka jingrakhe ia ka sngi ka jingioh jylla kaba 60 jong ka, kala kyntu ia ka Eastern Nagaland People’s Organisation (ENPO) ba kan pyrkhat arsien ha kaba iadei bad ka jingdawa ka jong ka na ka bynta ban pynioh noh la ka jong ka jylla ‘Frontier Nagaland.’
Na ka liang ka Congress Nagaland kala ong ba ka jingpynioh ia ki hok, ka jingialong mar ryngkat, nalor ka jingphaikhmat kaba kyrpang kan urlong lada ka Congress kan ioh ia ka lad ban thaw ia ka sorkar.
Nalor kata kane ka party ka buh ruh ka jingkyrpad ia ki nongtrei jong ki paid Naga hapoh ka ri ba kin pynkut noh ia ki jingikren khnang ban lah ban kyntiew ia ka jylla Nagaland bad ban lah pat ban thaw ia ki lad ioh kam ioh jam.
Ha ka jingthoh bala pyllait paidbah ka NPCC kala pynkynmaw ba ia ka kyrteng Nagaland la pynioh da u AZ Phizo, ia kaba hadien la kdew ruh hapoh ka constitution jong ka ri India ha ka 1 tarik u Nailar 1960, kata ha ka por ba u Myntri Rangbahduh (PM) Pandit Jawahar Lal Nehra ula ai ia kaj ingkren ha katei ka sngi hapoh ka parliament na ka bynta ka jingthaw ia ka jylla kaba kyrteng ka “Nagaland.”
Nalor kata ka NPCC kala ong ruh ba ka jingpulom jong ka sorkar ban pyniatylli ia ki nongshong shnong ka dei namar ka jingbym lah ban pynioh ia ki hok bad ki jingleh shiliang.
Haba pynpaw ka jingsngew kyndit halor kane ka jinglong jingman, ka NPCC kala kynnoh ia baroh ki 60 ngut ki nongmihkhmat halor ka jingbym don ka jingsngewkhia na ka bynta ka jinglong jingman jong ka jylla kaba ki mihkhmat.
Ha kawei pat ka bynta, ka kynhun seng kaba heh tam jong ki trai shnong riewlum ka Nagaland ka Eastern Nagaland People’s Organisation (ENPO), ha ka 1 tarik mynta u bnai kala ong ba yn ym don napoh ka thain ki ban iashim bynta ha ka tamasa ‘Horn Bill Festival’ kaba shiphew sngi kynthih kaba ju khring ia kiba bun bah ki briew na kylleng ka pyrthei, da kaba kam ba wat hadien kiba bun ki jingkyrpad hynrei na ka liang ka sorkar pdeng kala pulom ban pynioh ia ka jylla “Frontier Nagaland.”
Katba na ka liang ki nongshong shnong kiba dei ki Sumi ka Eastern Nagaland kila kyrpad ia u Myntri Rangbahduh ka ri ban iada bad pynneh ia ka jingangnud jong ki nongshong shnong na ka jaidbynriew Sumi ka Eastern Nagaland ba kin iai bteng ban don hapoh kane ka jylla Nagaland kaba mynta.
La kam ruh ba ha ka jingdawa jong ka ENPO ia ka jylla “Frontier Nagaland,”ia ka jingdon jong ki nongshong shnong jong ki jaidbynriew sumi ka Eastern Nagaland kumjuh ia ki jaka puta jong ki ruh la kynthup ha katei ka jingdawa jylla ia kaba la phah sha ka sorkar India.
