Shillong, Jymmang 09 : Hadien ba ka UPSC kala phah ia lai tylli ki kyrteng ki ban shimti kum u/ka Director General of Police (DGP) ba thymmai ka Meghalaya, ka BJP Meghalaya kala rai ban iakynduh ia u Myntri Rangbah ka Jylla ban ai jingmut ba un thung ia ka kong Idashisha Nongrang, IPS (RR-1992) ha kane ka shuki.
Haba iakren bad ki lad pathai khubor, u Nongiaktien ba hakhlieh duh ka BJP Bah Mariahom Kharkrang, dalade uba dei u Heh Pulit IPS bala shongthait ula ong “Ka Kong Nongrang ka dei kaba biang eh ban shimti ia kane ka shuki, nalor ba ka dei ka Pulit bala rangbah duh ha ka kam napdeng ki kyrteng bala phah bad kaba don jingshemphang bha ruh ia ka rukom treikam ka Tnad Pulit ka Jylla”.
“Ngi shim ia kane ka sienjam namar ngi ngeit skhem ba kane ka Ophisar Longkmie Khasi, kaba la kha bad heh bad san ha Meghalaya, kan ialam ia ka Tnad Pulit naba kan sngewthuh khambha ia ka jinglong jingman hapoh ka Jylla, kaba long kongsan eh haba trei ia ka kam kum ki Pulit” ong u Bah Kharkrang.
