Tura, Nohprah 04 : Ka Sorkar Meghalaya Democratic Alliance (MDA) kan kyntiew kyrdan sa ia ka Jengjal sha ka Civil Sub Division ba pura lashai ka sngi nyngkong.
U Myntri Rangbah ka Jylla Conrad K Sangma un plie paidbah ia kane ka Sub Division ba thymmai bad un pyllait paidbah ruh ia ka Drone Hub Centre kaba lah ban dei kaba nyngkong eh ha Meghalaya, ka ban pynpoi dawai bad kit ia ki test sample jong ki Nongpang na ki shnong ba sha nongkyndong. Ia kane ka Drone Centre yn plie na Adventist Mission Hospital.
Ka Jengjal kaba jngai kumba 30 Km na Tura, kan dei ka Civil Sub Division ba 6 ha Ri-lum Harp bad kaba 3 bala pynkha da u Myntri Rangbah ka Jylla Conrad K Sangma tang ha kane ka shibnai bala leit noh.
U Myntri Rangbah ula ong ba ka jingpynkha ia bun ki Block bad ki Sub Division ki dei kiba la leh na ka bynta ban rah ia ka jingshakri jong ka Sorkar shajan jong u paidbah.
Ka sor Jengjal kaba don lang hapoh ka Dadenggre Constituency ba mihkhmat da u hynmen u Myntri Rangbah, James K Sangma, ka dei ka jaka ba kongsan bha ba pyniasoh ia ka Assam, pyniasoh iaka East bad South Garo bad ka West Garo Hills District.
Ka dei ruh ka jaka ba don ka Kad Liengsuin ka Ri-lum Garo ha Baljek.
Nalor ka jingpynkha ia ka Civil Sub Division, ka Jengjal kala kylla long ruh ka jaka ba don ia ki jaka sumar kiba paka naduh ba ka Sorkar Jylla kala aiti ia ki Primary Health Centre sha ka kynhun ki doktor ka CMC Vellore kiba don hapoh ka Adventist Mission Society kaba la lah ban ai ia ka jingsumar bap aka tam ia ki Longkmie ba armet bad ki Khynnah da ka jingdon haduh lai ngut ki doktor Specialist ki Khynnah bad ka Doktor Gynarcologist kiba la wan naduh Vellore ban ai jingshakri ha kane ka Hospital hadien ka jingshakri bad ka World Health Organisation.
Kum u Director ka Adventist Mission Hospital, u Dr Denyl Joshua, Child Specialist ula ong “Ka Drone Hub kan poi sha ki jaka ba kyndong tam ban ai ia ki dawai kiba lah ban iada ia ki mynsiem briew bad wanrah jingkylla ha ki lad ai jingsumar”.
