Shillong, Risaw 18 : U Myntri ki kam jngohkai ka Jylla Bah Paul Lyngdoh ula kynthoh halor ka jingmih ki jingpyrshah ba pynlong ia ka Cherry Blossom Festival ha ka sngi U Blei da kaba ong “Man ka sngi ka dei ka ‘Sngi ba Khuid’ (Holy Day), bad sngi kyntang ym tang kawei ka Sngi (Sngi U Blei).
Kane ka jingkynthoh kala mih halor ka jingpyrshah jong ka seng Saindur Tipkur Tipkha Ehrngiew Hynniewtrep (STIEH) ba pynkut ia ka Shillong Cherry Blossom Festival ha ka sngi U Blei. Kane ka tamasa kan long naduh ka 17 tarik (sngi Thohdieng), 18 tarik (Sngi Saitjain) bad 19 tarik Naiwieng (Sngi U Blei) ha Bhoirymbong.
Haba iakren bad ki nongthoh khubor hynne ka sngi Balang, u Bah Paul ula ong ba man la ka sngi ka dei ka sngi ba ‘Khuid’ bad ba kyntang bad kam mut ba ki briew ki kylla long ‘khuid’ bad ‘ngeit blei’ tang ha kawei ka sngi jong ka taiew (Sngi U Blei) bad kylla pop biang ha kiwei pat ki sngi jong ka taiew.
U Bah Paul ula ong ba kam sngew don jingmut ban kynthoh eiei namar manla ka sngi ka dei ka ‘sngi khuid’ bad ba ‘kyntang’ ym tang kawei ka sngi ha ka taiew.
Ka Sorkar Jylla kala khmih lynti ba kane ka tamsa kan khring ia palat shilak ngut ki nongwan shangkai shapoh ka Jylla ban sakhi bad iashimbynta.
La pyntip ruh ba u Nongrwai ba pawnam ka pyrthei u Ronan Keating un wan ban pynshongshit ia ki paidbah da ki jingrwai ba pawnam jong u.
Nalor u Ronan Keating, ha katei ka festival yn wan ruh ban iashimbynta da ki kynhun nongtem na kylleng ki ri kiba kynthup iaka Pink Panda, Jonas Blue, Hybrid Theory bad Kenny Musk.
Nalor kane kin don ruh ki kynhun kiba pawnam kiba napoh ka jylla Meghalaya hi kiban iashimbynta ha katei ka tamasa, kiba kynthup ia u Bah Lou Majaw, Snow White, Meba Ofilia, Da Minot, Summersalt, Emperical Tribe, Street Stories, Banjop, Lokpante, Prinstone Sutnga, Claudia, Young Natee, Wanjop Sohkhlet bad kiwei kiwei.
