Kynthoh u Myntri ba kem droks ka HYC | Lada phi iaid pyrshah ia ka ain, ki kam jong phi ki long be-ain

Nang jyllei u droks ha Meghalaya naduh ba khie ki kam umsnam ha Manipur : Paul

Shillong, Risaw 17 : U Myntri ka Tnad Social Welfare Bah Paul Lyngdoh, ula kynthoh jur ia ka jingkem nongkhaii droks ka seng Hynniewtrep Youth Council (HYC) bad ong “Kano kano kam kaba phi leh kaba iaid pyrshah iaka Ain, kine ki kam ki kylla long kiba beain”.

U Bah Paul ula ong “U President ka HYC u dei uba pyndep ia ka jingpule ain. Phi dei ban kylli kaei kaba u top halor ka NDPS lane PITNDPS. La ka Ain jong ka Ri ka shah ia u ban shu leit kem ia ki briew?”.

“Phi lah ban ioh ia ki headline ha ki lad pathai khubor hynrei kane kam don jingmut satia ne wanrah jingkylla sha madan. Phi lah ban mih khubor katto katne sngi hynrei kaei kaei kaba phi leh kan nym ieng sakhi hakhmat ka Iingkashari bad kane hi ka dei ka jingshah rem lypa” ula bynrap.

U Bah Paul ula batai “Lada phi pule ia ka NDPS, kino kino ki briew kiba kurup droks, une u droks un dei uba don ha ka kti jong ki bad kila kylla long u briew uba hap ban batai balei ba u don u droks bad u…ta ka daw ngi la pyrshang ban pyniar ia ka jingtreikam jong ngi”.

“Phin iohi ba dei ka sien ba nyngkong ba ka Tnad Social Welfare kala mih shakhmat. Mynshuwa ki dei tang ki Pulit hynrei mynta ngi la don sa ka DREAM Mission kaba khlieh hi da u Myntri Rangbah ka Jylla. Kane ka pyni ia ka jingshimkhia bha jong ngi ia ka kam. Ngi kwah ban leh ia ki kam ha ka lynti kaba dei, kaba iada da ka ain ym ban ngat ha ka liang ka bym dei jong ka ain” ong u Myntri.

Nalor kane, u Myntri ula pyntip ba bun ki Dorbar Shnong kila pynkhreh mynta ban pynkha ia ki Village Defence Party (VDP) ban iakhun ia u droks hala ki jong ki shnong.

Ha kawei ka liang, u Bah Paul ula pyntip ba shen un sa leit sha Nongbah Delhi ban iakren bad ka Sorkar India halor ka jing mad ka Meghalaya ia ka jingkiew ka kam khaii droks hadien ba khie ki kam iaumsnam ha Manipur.

“Ngi la kut jingmut shisha ban ratdyngkhong ia u droks ha Meghalaya. Kaba sngewsih ka long ba ngi don ha ka jaka kaba marjan bad ka Golden Triangle bad ka jingkhie ki kam umsnam ha Manipur kala lam sha ka jingkynriah ka kam shalan droks na katei ka jaka sha Meghalaya” ula ong.

“Ngan sa leit sha Delhi bad ngan pynthikna ba ki nongialam ha ka Sorkar India kin ioh ia ka jingbatai kaba bniah ia ka jing khraw ki jingeh bad ka jingnang jyllei ka kam khaii droks hapoh ka Jylla” ula bynrap.