Pdiang sngewbha ia u MLA barim ka Nongkrem bad ki Nongkyrshan
Shillong, Naiwieng 13 : U National President ka NPP bad Myntri Rangbah ka Jylla Conrad K Sangma ha ka sngi Palei, ula khein dewthala ia kiba bun ki jingkynnoh na ki seng sain pyrthei ba don ha ka Liang Pyrshah bad ong “Ym ju don mano mano ruh ban kawang maw ia u dieng u bym don soh”.
Haba kren ha ka jingialang ka party ban pdiang ia u MLA barim ka Nongkrem Bah Lambor Malngiang bad ki nongkyrshan, u Conrad ula ban jur ba ka NPP kala sakhi ia ki kam ba ka trei ba kila pynkylla dur ia ka Meghalaya bad ka jingbym lah ban pdiang ki Liang Pyrshah ia kane ka jingkiew shakhmat, kala pynlong ia ki ban pynsaphriang ia ki khubor lamler bad ialam bakla ia u paidbah.
“Ki don shibun ki mat bala kren da ki seng sain pyrthei ba don ha ka Liang Pyrshah pyrshah ia ka NPP. Nga ju ong ia baroh ba ym ju don mano mano ruh ban kawang maw ia u dieng u bym seisoh. Mynta, ki Liang Pyrshah kila iohi bad sngewthuh ia ki jait kam ba ngi la leh ban pynkylla dur ia ka Jylla. Kila iohi ia ki kam bad kim kwah ban pdiang ia ka roi ka par bad kim kwah ia ki paidbah ban pdiang lane ban iohi ia ki. Kumta ha ka jaka ban iakren ia ki kam ba iadei bad ka roi ka par lane ki kam kiba kongsan jong ka Jylla, ki Liang Pyrshah ki pyrshang ban wanah ia kiwei pat ki khubor ban pynthame ia u paidbah, ki khubor ki bym dei satia kiba shisha”.
U Conrad ula kyntait war ruh ia ki khubor hamsaia ba ong ba ka don ka jingiashrut hapdeng ki nongia lam hapoh ka NPP kum ka jingiashrut hapdeng jong u, u Symbud Myntri Rangbah Bah Prestone Tynsong bad Symbud Myntri Rangbah Bah Sniawbhalang Dhar.
U iathuh ba ula iakren bad u Bah Sniawbha, uba la pynthikna ba ki khubor ki dei kiba khlem nongrim.
“Haba kane ka khubor ka mih, nga la kren ia u Bah Sniawbhalang Dhar bad nga la kylli na u, la u dom? Ula ong ba ngam tip nangno kane ka khubor ka mih” ong u Conrad.
Ha kajuh ka por, u Myntri Rangbah ula pdiang ia u Bah Lambor bad ki nongkyrshan, kiba la wan pyniasoh sha ka NPP bad ong ba u don ka jingiadei paralok kaba iajan bha bad u Bah Lambor kaba la suhthied na ka jingiaburom markylliang bad ka jingangnud ban shakri ia ka Jylla.
“Ka jingialong paralok jong ngi ka kham khraw ban ia ka sain pyrthei, kaba shong nongrim ha ka jing shaniah bad ka jingiakwah ban shakri beit ia u paidbah ka Jylla jong ngi” ula ong.
U Conrad ula ai khublei ia kine ki dkhot thymmai kiba la ai ka jingshaniah ha ka thong jong ka NPP ban pynkylla ia ka Meghalaya bad pynskhem ruh ia ka nongrim jong ka party ban pynleit jingmut ha ka roi ka par bad ka jingkiew lang jong baroh ki constituency.
