Shillong, Nailur 19 : U Myntri Rangbah ka Jylla Conrad K Sangma ha ka sngi Ba-ar, ula khein ia ka jingkynnoh u Myntri Rangbah barim Dr Mukul Sangma lyngba ka dur ba u (Conrad) don jingiadei bad u briew uba shah kem kum u Kingpin ha ka jingioh kurup droks ha Manipur, kum ka kam ba kam kai khait ban pynshisha ia kano kano ka kam.
U Dr Mukul ula kynnoh ba u Myntri Rangbah u don ka jingiadei ba iajan bha bad une u nongkhaii droks na Manipur haba pyni ruh ia ka dur u Conrad , ka kurim bad u Henry Lalremsanga, uba shah kem ha ka 23 tarik Iaiong, 2023 halor ka jingioh kurup ia u droks ba shongdor T. 6 klur.
Kane ka jingkynnoh kala mih hapoh ka Iingdorbar Thaw Ain ha ka por ba iatai ia ka motion halor ka jingkynrei u droks hapoh ka Jylla.
“Ka long kaba sngewsih ba u briew ha ka kyrdan jong u (Mukul) ban wanrah ia ka dur bad shu shim rai ia kaei kaei baroh. Ban pyniadei ia ki briew tang na ka dor ki arngut ki briew ba shu iashondur lang, nga sngew ha ka pyrthei mynta, ka dei ka kam ba kam kai ban pynshisha ia kano kano ka jingkynnoh. Ta ka daw ngam don eiei ban kynthoh ia kane” ong u Conrad haba iakren bad ki nongthoh khubor.
Haba pynpaw ba u la shondur bad ki million ngut ki briew kum u nongmihkhmat paidbah, u Conrad ula ong “Nga iakynduh bad nga iashong khana bad nga iashondur bad ki million ngut ki briew. Wat haba nga iaid ha ki surok, ki don ki briew ba pynsangeh ia nga, ngam ju on gem, namar ngi dei ki nongmihkhmat paidbah”.
“Nga sngew ban pyndon jingiadei ia ki kam jong arngut ki briew tang namar ka dur bad ban shu rai kut noh, nga sngew ba ka dei ka kam ka bym shongnia iano iano ruh ban shu leh kumta” ong u Conrad haba bynrap “Kan hap ban don ki sakhi ki satar ia kiei ki kam kiba la jia. Kaba nyngkong hi, ngam don jingtip eiei ruh em, kiei kita ki kam ba u leh bad nga ithuh ia bun ngut ki briew kiba don ha katei ka jaka bad kum u nongialam aidbah ngi hap ban iakren bad baroh ki briew”.
“Hato ka kyrteng u Conrad ka mih ha kano kano ka mukotduma ha Iingkashari ne ha ka police case?. Nga sngew ba kane ka dei ka jingkylli ba donkam bha. La ngi la shah khot iakren lane don kano kano ka case bala ujor pyrshah ia ngi, nga sngew ba kine ki dei ki nongrim kiba dei ban kynthoh kum u briew uba la don ia ka kyrdan” ula bynrap.
Haba kylli, u Myntri Rangbah ila ong ba un sa leh eiei halor kane ka kam kat kum ki rule bad ki kyndon kiba don hapoh ka Iingdorbar Thaw Ain.
Pule lang ia kane: ‘Na ka jingkwah iabam jingbam khyllah ha Hostel…’ kylla huri hura ba heh ha NEHU
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
