Shillong, Nohprah 02 : U Myntri Rangbah ka Jylla Conrad K Sangma ula kynthoh ba ka seng Congress ka dei ka seng ba “iapait iapra napoh Iing” bad kam donkam ia ki jingiarap ki bor ba namar ba kan iapra.
“Ban kren beit beit, ym donkam mano mano ruh ban leh eiei ha kaban pynpait pynpra ia ki namar ki dei kiba la iapait iapra lypa” ong u Conrad haba iakren bad ki nongthoh khubor ha ka sngi Ba-ar haba jubab ia ka jingkynnoh u President ka MPCC Bah Vincent H Pala ba ka jingthmu ban thaw ia ka Northeast Front ka dei kaba la kyrshan da ka BJP ban pyniapait iapra ia ki kynhun ba shun BJP ha ka thain.
Une u National President ka NPP ula kynnoh ruh ba ka Conress ka dei kaba don iaki jingiapher jingmut hala iing bad ki plan ban iaid la la ki jong ki lynti.
“Ka Congress ka dei kaba iapait iapra hi napoh Iing. Ki don ia ki jingiapher jingmut. Ki lah ban iashonglang ha kajuh ka miej bad iakren hynrei napoh napoh ki don la ki jong ki jingthmu ban iaid la ka jong ka mon” ula ong haba pynpaw “Ngi la iakren ia kiba bun na ki ban shu iakren shai. Ka dei ka iing kaba iapait iapra lypa. Kim donkam ia ngi ban nang phiah shuh shuh ia ki. Ka long kaba sngewbynniaw ba u President ka MPCC u kynthoh kumne”.
U Conrad ula ban jur ba ka party jong u, ka NPP, ka pynleit jingmut ha ka jingiatylli bad ban shakri ia ki paidbah, ha ka jaka ban iakhun pyrshah ia kiwei.
“Ha ngi kum ka party, ngi la kren shai bad ngi la ong ruh haba shai ba ngim don hangne ban iakhun pyrshah iano iano ruh lane ngi don hangne ban pyrshah iano iano, ngi wan hangne na ka bynta ban wanrah ia ka jingiatylli bad ban phah ia ka khubor ka jingiatylli jong ka thain baroh kawei” ula kynthoh.
U Conrad ula ong “Ngi la iaban jur ba ngi ngeit ba ki Jylla ka thain Shatei Lam Mihngi bad ki Jaidbynriew bapher bapher ki dei ban iatreilang na ka bynta ka jingmyntoi ka thain namar ynda poi ha ka kam sain pyrthei, ka dei satang lada ngi iatylli bad don tang kawei ka Kynhun, kane ka dei ka lynti ba ngin lah ban pynsngew ia ka khubor jong ngi ha ka Ri bad ban shakri ruh ia ki briew jong ngi ha ka rukom kaba dei” ula ong haba bynrap “Ngi don hangne ban ai ia ka khubor kaba bha, ban pyniatylli bad phah ia ka khubor ka jingiatylli jong ka thain baroh kawei”.
U Myntri Rangbah ula ban jur ia ka jingkongsan ba ki Jylla ka thain Shatei Lam Mihngi kin iatreilang bad sei tang kawei ka kynhun ban lah kynjoh ia ka thong bad shakri kham bha iala ki jong ki briew.
