Kynthoh u CEM barim ka KHADC | Baroh ki seng sain pyrthei ki thungkam iala ki briew | U Bah Ardent u thung 16 ngut

Shillong, Jylliew 14 : U Chief Executive Member (CEM) barim ka Khasi Hills Autonomous District Council (KHADC) Bah Pyniaid Sing Syiem, ula kynthoh ba baroh ki seng sain pyrthei bad ki CEM ba synshar ia ka Council, kila don bynta lut ha ka jingthung kam iala ki jong ki briew haba kynnoh ba u President ka VPP Bah Ardent M Basaiawmoit ruh, ula thung haduh 16 ngut ki briew lajong mynba u dang long CEM.

U Bah Pyniaid ula kynthoh ia kane halor ka Office Order ka Executive Committee ba ialam da ka VPP ha KHADC, ba hukum ban beh kam iaki 13 ngut ki nongtrei casual bala dep pynskhem ia ka kam jong ki (permanent) bad jingpynhiar kyrdan ia 30 ngut na ki nongtrei ba pura sha ki nongtrei casual.

“Nga don tang artylli ki mat ban kynthoh ia kane-kawei ka long ba lehse ka EC ka VPP kam don ia ka bor ban treikam ne kim don ia kata ka jinglah ban treikam bad da ka jingbehkam kumne, kan kham sting ia ki” ula kynthoh.

“Kaba ar ka long lehse ki pyrkhat ba kine ki briew ki dei jongno re jongno ne jong kino kino ki seng sain pyrthei bad da ka ba weng kam kan iarap ia ki” ula bynrap.

U Bah Pyniaid ula kynthoh ba kat kum ka jingshem jong u “Ha District Council, baroh ki seng sain pyrthei ba synshar kila thep kam iala ki jong ki briew kiba wan ban aplai lyngba u Secretary”.

“Ha ka por ba u President ka VPP Bah Ardent Miller Basaiawmoit u bat ia ka shuki CEM ha KHADC, ula thungkam haduh 16 ngut ki briew lajong ha u snem 2014” ula kynnoh.

U Bah Pyniaid ula kynthoh ba lada kane ka EC ka VPP ka kwah ban wanrah ia ka policy thungkam, ka la dei ia ka ban wanrah ia ka policy kaba treikam nangne shakhmat ym kaba trei nangne shadien namar kane kan ktah shisha ia kito ki nongtrei.

Ia ka jingkam ka EC ka VPP ba ka jingweng kam ka dei namar ba la shu thung ia ki khlem ka sanction post ne ka kam bala mang, une u CEM barim ula ong “Ha ka por jong ngi, ngim ju kynmaw ban ong ba khlem don ka sanction post bad hap weng kam ia ki nongtrei hynrei ka dei ka kamram jong ngi kumka EC ban shim ia ka jingkitkhlieh ha kaban wad ia ki lad ki lynti ban lah pynskhem ia ki”.

Ula kynthoh ruh ba kane ka EC ka VPP dang ha u bnai Lber, kala dep mynjur ia ka Vote of Account ne ka mang tyngka ba lai bnai, kaba la kynthup ne pynrung ia ka tulop jong baroh ki nongtrei. “Nga sngew ba kam don shuh ka lynti ban shu kynnoh ne ai daw bym don sanction post”.

Ha kajuh ka por u Bah Pyniaid u la ai khublei ia u nongbishar ka Meghalaya High Court u B Bhattacharjee uba la pynsangeh noh ia ka Office Order ka KHADC ba la pynmih ha ka 30/05/2025 ba pynhiar kyrdan ia ki nongtrei bala dep pynskhem pura sha ka kyrdan nongtrei casual.