Shillong, Nailur 26 : “Ka jingkynnoh pyrshah ia ka jingim shimet jong u briew ka dei ka kam Khyllung khynnah” ong u MLA ka BJP bad Myntri Sorkar Bah A.L.Hek haba jubab ia ka jingkam u Nongialam ka AITC Dr Mukul Sangma ba u Myntri Rangbah ka Jylla Conrad K Sangma u don ka jingiadei ba iajan bad u briew ba kynnoh ‘Drug Kinglin’ na Mizoram.
U Bah Hek ula ai nuksa ba kyllum haba ban jur ba ym ju dei ban artatien ha kaban don jingiadei badno badno ruh da kaba ong ‘Lada ki briew ki pyni ba ki burom ia nga, nga ruh ngan pyni ia ka burom”. Ula kynthoh ba ka jingiashondur lang badno badno ruh kam dei satia kaba bakla.
Haba iakren bad ki nongthoh khubor, u Bah Hek ula kynthoh ba kaei kaba u Dr Mukul ula kren hapoh ka Iingdorbar Thaw Ain ka dei ka kam Khynnah.
U Bah Hek ula ban jur “Phi don iala ka jingim shimet, nga don la ka jong ka jingim shimet, baroh ki don la ki jong ki jingim shimet….ka long khynnah ban wanrah ia ka jingim shimet ha ka rynsan paidbah”.
Hynrei, haba kylli halor ka jingkynnoh jong u Dr Mukul pyrshah ia u CM ba mynta, u Bah Hek ula kiar ban kynthoh bad ong ba um kwah ban tuklar ia ka jingim ba shimet jongno jongno ruh hynrei u pynrem jur ia ki jingkynnoh u Dr Mukul da kaba ong “Ym ju dei ban wanrah ia ka kam shimet u briew ha ka rynsan paidbah”.
Ula ban jur ruh ba kam don satia ka jingleh bakla ban ialong paralok badno badno ruh, haba ai nuksa ia ka Mary Magdalene, kaba shah kynnoh thei awria hynrei la pdiang pat ia ka da u Jisu Khrist.
