Shillong, K’lyngkot 19: U Symbud Myntri Rangbah ka Jylla Bah Prestone Tynsong hynne ka sngi Thohdieng ula ong ba i kumba ki Ophisar ba la shongthait, kiba lah shah wengkam na Lokayukta ki dei kiba don jingiadei bad ki Nongialam ka Liang Pyrshah Voice of the People Party (VPP).
Haba kynthoh ia ka jingiakhih ki MLA ka VPP ban dawa thungkam biang ia ki Ophisar bala shah weng kam, u Bah Prestone la ong “Nga iohi ba ka jingdawa ba nyngkong eh jong ka VPP ka long ban thungkam biang ia ki Ophisar bala shongthait hynrei nga kwah ban kylli ba halor kaei ka nongrim (ba ka Sorkar kan thungkam biang ia ki)…ia mynta hi ngi la don ia ki Ophisar ba dang don ha ka jingshakri ba kin long dkhot ha Lokayukta”.
“Ngam tip balei ba ki (MLA ka VPP) hap ban mih sha surok bad kren ia kine kiei kiei. Ngi la iohi ia ka shithi ba ki phah, Ngi la dep pule baroh bad ngi la dep ruh ban pynshai ba kine ki dei ki rule” ula ong bad bynrap “Ngam iohi ia ka jingbakla hangno hangno ruh bad ka rai bala shim daka Sorkar ban wanrah ia ki Ophisar kiba dang don ha ka jingshakri ha kine ki lai tylli ki kam”.
Haba pynpaw ba ka don ka jingiapher bak ly bak hapdeng ki Ophisar ba dang don ha ka jingshakri bad kiba la shongthait, u Bah Prestone ula ong “haba ngi thung ia ki Ophisar ba dang don ha ka kam, ngi la kunai ia ka pisa. Ha ka jaka ban ai tulop ia ki, ngi lah ai sha ki tang ka TA/DA ba ki shong bishar kam. Dei namar kata ba hadien ka jingbishar bha, ngi la thung ia ki”.
Halor ka jingkylli, u Symbud Myntri Rangbah haba thalain tyngeh ia ka VPP b aka pyrshang ban pyniasoh ia ka rai jong ka Sorkar ba ka kam bamsap ba donkti lang u MLA, uba la shah chargesheet ha ka Lokayukta, ula ong “La I kumba kito ki Ophisar ba shah weng kam ki don jingiadei bad kito ki briew (na ka VPP)”.
Haba pynpaw ruh ba kam don nongrim satia ia ka Sorkar ban khot ia ka VPP sah ka jingiaken, u Bah Prestone ula ong “Ngin ym khot satia ia ki sha ka jingiakren. Lada ki kwah ban iakren ngi long kiba kloi hynrei balei ban gin khot ia ki haba ngi lah dep ban pynshai ia baroh”.
Nalor kane, u Symbud Myntri Rangbah ula iai ban ba ka Sorkar ka hap ban iaid kat kum ka Act bad ka Rule jong ka Lokayukta, kaba kren shai ba dei ki Ophisar ba dang don ha ka jingshakri, kiba hap thung hapoh ka Lokayukta.
