Shillong, Kyllalyngkot 19: Ka Sorkar Jylla hynne ka sngi Thohdieng kala rai ban pynduh noh ia ka Meghalaya Civil Task Force Act, 1974.
Haba iakren bad ki nongthoh khubor, u Myntri Rangbah ka jylla u Conrad K Sangma , ula ong ba ia ka Meghalaya Civil Task Force Act la thaw naduh u snem 1974.
“Namar ba kila don ki jingkylla ha ka rukom treikam bad ka jingshisha ka long ruh ba ia katei la donkam ha katei ka por bad haba la thaw ia ka Meghalaya Civil Task Force ka long kaba iapher bad kane ka sngi jong ka pyrthei mynta bad ka task force kam long shuh kaba donkam haduh katta katta ha kaba baroh ki nongtrei jongki tnad bapher kila pyndep ia baroh ki jingdonkam bad ma ki baroh kila lah ban shongthait naka kam ne kila shim ia ka VRS” ula ong.
“Kumta katei ka Act kala long ka bym donkam shuh bad kumta ban pynthika ba kan ym don kano kano ka kynrum kynram, ka kynhun myntri mynta kasngi kala rai ban pynduh noh ia ka bad kila don 3 tylli ki Post kiba la don bad ia kine yn sa pynrung noh ha ka tnad sorkar ha kiwei pat ki shnad bad ia kane ka jingpynduh noh ia kane ka aiñ yn sa rah ha ka iingdorbar thawaiñ jong ka jylla” ong u Myntri Rangbah.
Ha kawei pat ka liang ka Kynhun Myntri kala ai jingmynjur iaka kyrteng kiban ioh pdiang ia ka Meghalaya Day Award bad ia kane yn sa pynbna paidbah ha ka jingrakhe iaka Meghalaya Day ha Tura.
Nalor kane ka Kynhun Myntri kala ai jingmynjur ruh iaka thup kyrteng jong ki heh sorkar kiban pynher iaka lama jong ka ri bad ban shim ia ka Salute ha ka jingrakhe iaka Republic Day ha ka 26 tarik u Kyllalyngkot ha ka jylla.
