Kyntait ba dei ka jingshimram
Shillong, Nohprah 13: Kino kino kiba kynthoh ba ka skhim FOCUS bad FOCUS plus kadei ka skhim sam pisa ilekshon kim sngewthuh kumno ka sorkar ka treikam bad kumno ka sorkar ka pyniaid iaka pisa bala mang naka bynta ki paidbah ka jylla.
Ia kane la ong da u Myntri Rangbah ka jylla u Conrad K Sangma haba jubab iaka jingkynnoh ka Bharatiya Janata Party (BJP) ba ka sorkar Meghalaya ka shim ram T. 1500 klur ban sam pisa T. 5000 lyngba ka skhim FOCUS bad FOCUS plus naka bynta ka ilekshon 2023.
Haba jubab ia kane ka jingshah kynthoh ka sorkar jylla, u Conrad u la ong ba kine ki briew kiba kynthoh ba ka sorkar ka leh poitiks iaka skhim FOCUS bad FOCUS plus ki ibein iaki nongrep bad iaki longing ba duk jong ka jylla.
“Kaba nyngkong nga kwah ban pynshai ba ki ba kynthoh kila bakla namar ka sorkar jylla kala mang T. 400 klur ym T. 1500 klur ban iarap iaki paidbah khamtam ki nongrep bad ki longing ba duk lyngba ka skhim FOCUS bad FOCUS plus” ong u Conrad.
U Conrad u la iathuh ba ka sorkar ka don ka thong ban iarap sha ki 4 lak tam ki longiing lyngba ka skhim FOCUS bad FOCUS plus bad kane ka song pisa ba ka sorkar ka mang kam dei satia ba ram ba ka sorkar ka shim ban sam sha ki paidbah.
U la ong ba ki ba kynthoh kidei ban sngewthuh kumno ka sorkar ka pynmih pisa la kadei naka bynta ki paidbah ne na ka bynta ban pyntreikam iaki skhim ne projek daka ba lum ki jait khajna, daka ba ioh jingiarap na shabar (Externally Aided Project) ne da ka ba shim na kiwei kiwei de.
“Ka long ka ba sngewsih ban tip ba ki don ki briew kiba pyrshang ban ialam bakla iaki paidbah ba ka skhim iarap pisa iaki nongrep bad iaki ba duk, kadei ka mat ilekshon (Agenda) jong ka sorkar bad kane ka kdew shai ba kine kiba kynthoh kim don ka mynsiem synei iaki longing ba duk” la bynrap u Conrad.
Nalor kane u Myntri Rangbah ka jylla u la pynksan iaka skhim FOCUS bad FOCUS plus daka ba ong ba kane kam dei satia ka mat ilekshon namar ia kane la pyntreikam naduh u snem 2021 bad lada ka sorkar ka thmu leh politiks ia kane, kan ka jin la sdang ia kane ka skhim mynta u snem 2022 ban ioh jingshaniah na ki paidbah haka ilekshon 2023.
U Conrad u la ong ba kito kiba kynthoh pyrshah iaka skhim FOCUS bad FOCUS plus kidei ban leit iakren bad nongrep bad ki longing baduk bad kin sa shem haduh katno kane ka skhim kala iarap iaki ban kyntiew iaka ioh ka kot bad ban pynbit pynbiang iala ki ing ki sem.
