Shillong, Naitung 30: Ka Hynniewtrep Youth Council (HYC) bad ka Hynniewtrep Integrated Territorial Organisation (HITO) ki la kyntait iaka jingkam u Nongialam ka BJP bad Myntri Sorkar Bah AL Hek ba ong ba ka ain Meghalaya Residents, Safety and Security Act (MRSSA) ka dei ka ain kaba bha ban tehlakam ia ka jingwan rung kyrthei ki briew ba nabar hapoh ka Jylla.
Ha ka kywroh u President ka HYC Bah Roy Kupar Synrem u la ong ba ka MRSSA ka dei ka ain ka “bym don bniat” khlem ki kyndon ba kyrpang ban pyrrkhing ia ka jingwan rung ki briew ba nabar bad ka jingpyntreikam iaka ILP ka long kaba donkam bha ban iada iaka bha ka miat ki paidbah bad ka Jylla.
“Ngi la ïohi ïa ka jingkren u Bah AL Hek, uba la ong ba ‘ka MRSSA ka dei ka ain kaba bha bad ka lah ban tehlakam ïa ka jingwan rung ki bar Jylla shapoh ka Jylla. Ngim lah peiphang kumno ka MRSSA ka lah ban peit ne tehlakam ïa ka jingwan rung ki briew shapoh ka Jylla haba ka aiñ hi kam shym la batai shai ba ka dei ka ain ban tehlakam iaka jingwan rung ki briew’. Ka MRSSA aiu kata kaba u Bah Hek u kren” la buh jingkylli u President ka HYC.
“Ngi kwah ban kyrpad ia u Bah Hek bad ia baroh kiba kyrshan ba ka MRSSA kadei ban tehlakam iaka jingwan rung ki briew ba nabar hapoh ka Jylla ba kin sngewbha ban pule ia ka ain 2016 bad ia ki hukum jong ka Meghalaya High Court ha ka mukotduma jong ka PIL No. 13 jong u snem 2020, kaba khang ia ka jingtreikam ki khyrdop hapoh ka Sections 17 bad 18 jong ka Act.
U Bah Roy ula pynpaw ba ka MRSSA 2016 ka dei tang kawei pat ka aiñ ban peit iaka jing ai wai iing, kaba treikam ïa baroh ki nongshong shnong jong ka Jylla bad kan ym long satia kum ka ain ba paka ban tehlakam ne pyrkhing ïa ka jingwan rung ki briew ba nabar sha ka Jylla.
Ula ong baka jingkren u Bah Hek ka long ka jingpyrshang ban ïalam bakla ïa ki trai Jylla kiba la angnud la slem bha ban pyntreikam ïa ka aiñ ILP.
Kumjuh ruh u President ka HITO Bah Donbok Dkhar u la ong ba ka seng kam iahap satia ia ka jingkren jong u Bah AL Hek namar ba ka MRSSA ka dei ka ain kaba lah ban shah weng noh ha ka High Court lane Supreme Court ha kano kano ka por.
U Bah Donbok ula ban jur ba ka Inner Line Permit (ILP) ka long kaba donkam eh na ka bynta ban iada ia ka riti dustur ba kyrpang jong ka Meghalaya bad ka jinglong tynrai jong ka histori ki paidbah bad ka Jylla.
Halor ka jingkam jong u bah Hek ba ka MRSSA ka ai ia ka bor ba pura ia ki khlieh nong synshar shnong ne ki dorbar shnong, u Bah Donbok u la ong ba kane ka pynpaw shai ia ka jingbym sngewthuh u Bah AL Hek iaki mat ba ktah ia ka jaidbynriew u Hynñiewtrep.
Ka HITO ka la kyntu ruh ia u Bah Hek ba un leh ia ka jingwad bniah bad ban iamir jingmut bad ki kynhun bapher bapher hashuwa ban pynmih ia ki jingpynbna paidbah.
Haba pynpaw ia ki jingiapher ba kongsan hapdeng ka ILP bad ka MRSSA, ka HITO ka la ong ba ka ILP ka khanglad ia ki briew kiba nabar ban rung shapoh ka jylla bad ka ai jingiada hashwa ban rung katba ka MRSSA ka pynleit jingmut tang ia ki nongshong wai.
 bad ka Hynniewtrep Integrated Territorial Organisation (HITO) ki la kyntait iaka jingkam u Nongialam ka BJP bad Myntri Sorkar Bah AL Hek ba ong ba ka ain Meghalaya Residents, Safety and Security Act (MRSSA) ka dei ka ain kaba bha ban tehlakam ia ka jingwan rung kyrthei ki briew ba nabar hapoh ka Jylla.){kind=link}